Haribhadra: Dhuttakkhāṇa

namiūṇa jiṇa-var'iṃde tiyasesara-vaṃdie dhuya-kilese /

viusajaṇa-bohaṇ'atthaṃ Dhuttakkhāṇaṃ pavakkhāmi // HaDh_1.1 //

laliya-samiddha-jaṇavayā atthi purī surapuriṃ visesaṃtī /

ujjuya-jaṇāhivāsā Ujjeṇī nāma nāmeṇaṃ // HaDh_1.2 //

tīse uttarapāse nāṇāviha-kusuma-gumma-laya-gahaṇaṃ /

mahuyari-gaṇovagīyaṃ ujjāṇaṃ Naṃdaṇa-saricchaṃ // HaDh_1.3 //

tatth' ujjāṇa-gihammī nāṇāviha-rūva-kamma-ṇijjuttā /

dhuttāṇa sayāṇegā samāgayā kaha vi hiṃḍaṃtā // HaDh_1.4 //

māyā-ṇiyaḍi-pahāṇā akajja-ṇicc'ujjuyā niraṇukaṃpā /

thī-bāla-vuḍḍha-vīsattha-ghāiṇo vaṃcaṇ'ekkaparā // HaDh_1.5 //

(Antyavipulā)

dhūv'aṃjaṇa-jogehi ya osoyaṇi-thaṃbhaṇīhiṃ vijjāhiṃ /

sara-vaṇṇa-bheya-kusalā tesi pahū paṃc' ime kamaso // HaDh_1.6 //

Mūlasiri Kaṃḍarīo Elāsāḍho Saso ya Khaṃḍavaṇā /

ekk'ekkassa ya tesiṃ dhuttāṇaṃ paṃca-paṃcasayā // HaDh_1.7 //

dhuttīṇaṃ paṃcasayā Khaṃḍavaṇāe ya navari parivāro /

savvāṇa vi tāṇa pahū Mūlasirī loya-vikkhāo // HaDh_1.8 //

vaṭṭai ya tāṇa kālo jalaya-samucchanna-sūra-sasi-maggo /

iṃdadhaṇu-vijju-gajjiya-jalayara-muhalo varisayālo // HaDh_1.9 //

sattāha-duddiṇammi ya samaṃtao bhariya-vappa-kūva-sare /

kaya-cikkhilla-cilipphila-dussaṃcārāsu racchāsu // HaDh_1.10 //

eyārisammi kāle te dhuttā sīya-vaddalābhihayā /

bhukkh'attā beṃti tahiṃ ko amhaṃ dejja bhattaṃ ti // HaDh_1.11 //

aha bhaṇai Mūladevo jaṃ jeṇa suyaṃ va samaṇubhūyaṃ vā /

so taṃ kaheu savvaṃ miliyāṇ' eyāṇa dhuttāṇaṃ // HaDh_1.12 //

jo taṃ na pattiejjā asacca-vayaṇaṃ ti teṇa savvesiṃ /

dhuttāṇa samuiyāṇaṃ dāyavvaṃ bhatta-pāṇaṃ ti // HaDh_1.13 //

jo puṇa purāṇa-Bhāraha-Rāmāyaṇa-sui-samuttha-vayaṇehiṃ /

taṃ vayaṇaṃ samatthittā mahāyaṇaṃ pattiyāvejja // HaDh_1.14 //

so dhuttāṇa ahivaī mahāmaī atthi sattha-ṇimmāo /

mā deu kiṃci kassa vi iya bhaṇie Mūladeveṇa // HaDh_1.15 //

te savve viya bhaṇiyā iya hou susohaṇaṃ tae bhaṇiyaṃ /

kiṃtu tumaṃ paḍhamaṃ ciya kahehi jaṃ te samaṇubhūyaṃ // HaDh_1.16 //

aha bhaṇai Mūladevo jaṃ aṇubhūyaṃ mae taruṇa-bhāve /

taṃ nisuṇeha avahiyā kahijjamāṇaṃ sujuttīe // HaDh_1.17 //

taruṇattaṇammi ahayaṃ icchiya-suha-saṃpayaṃ ahilasaṃto /

Dhārā-dharaṇ'aṭṭhāe Sāmi-gihaṃ patthio suiraṃ // HaDh_1.18 //

chatta-kamaṃḍalu-hattho paṃthaṃ vāhemi gahiya-pacchayaṇo /

mattaṃ pavvaya-mettaṃ pecchāmi ya gayavaraṃ iṃtaṃ // HaDh_1.19 //

meham iva gulaguliṃtaṃ pabhinna-karaḍā-muhaṃ mahāmattaṃ /

daṭṭhūṇa vaṇagay'iṃdaṃ bhaeṇa vevaṃta-gatto haṃ // HaDh_1.20 //

attāṇo ya asaraṇo kattha nilukkāmi haṃ ti ciṃtaṃto /

to sahasā ya aigao kamaṃḍaluṃ maraṇa-bhayabhīo // HaDh_1.21 //

aha so vi matta-hatthī ūsaviya-karo sarosa-ratt'accho /

majjhāṇumagga-laggo kamaṃḍaluṃ aigao sigghaṃ // HaDh_1.22 //

to haṃ bhaya-saṃbhaṃto samaṃtao vidduyaṃ paloyaṃto /

hatthiṃ kamaṃḍalummī vāmoheūṇa chammāsaṃ // HaDh_1.23 //

gīvāĕ niggao haṃ hatthī vi mamāṇumaggao niṃto /

laggo vāl'agg'aṃte kuṃḍiya-gīvāĕ chiddammi // HaDh_1.24 //

aham avi ya navari purao Gaṃgaṃ pecchāmi raṃgira-taraṃgaṃ /

pheṇa-ṇiyar'aṭṭahāsaṃ vaṇagaya-daṃta-kkhaya-taḍ'aggaṃ // HaDh_1.25 //

ummī-sahassa-pauraṃ jhasa-mayara-ggāha-kumma-pariyariyaṃ /

juvai-hiyaya vv' agāhaṃ uyahi vva sudūra-parapāraṃ // HaDh_1.26 //

paham annaṃ alahaṃto to haṃ isu-veya-vāhiṇiṃ sigghaṃ /

bāhāhiṃ samuttiṇṇo gopayam iva Bhārahiṃ viulaṃ // HaDh_1.27 //

to Sāmi-gihaṃ gaṃtuṃ chuha-taṇhā-parisahehiṃ sahamāṇo /

chammāsā sīseṇaṃ dharemi Dhārā-dhar'aṭṭhāe // HaDh_1.28 //

dhāreūṇa ya Dhāraṃ payao ahivaṃdiūṇa Mahaseṇaṃ /

saṃpatto Ujjeṇiṃ tubbhehiṃ samaṃ ca milio haṃ // HaDh_1.29 //

to jai saccaṃ eyaṃ to me heūhiṃ pattiyāveha /

aha mannaha aliyaṃ taṃ dhuttāṇaṃ deha to bhattaṃ // HaDh_1.30 //

aha bhaṇai Kaṃḍarīo ko bhaṇihī tumam asacca-vayaṇaṃ ti /

Bhāraha-purāṇa-Rāmāyaṇāṇi puriso viyāṇaṃto // HaDh_1.31 //

(Antyavipulā)

paribhaṇai Mūladevo so hatthī kuṃḍiyāĕ kaha māo /

kaha bhamio chammāsaṃ kamaṃḍale tammi vaṇahatthī // HaDh_1.32 //

suhuma-cchiddeṇa kamaṃḍalāŏ kaha niggao ahaṃ so ya /

niggaṃtuṃ vaṇahatthī vāl'agg'aṃte kahaṃ laggo // HaDh_1.33 //

(Ādivipulā)

kaha Gaṃgā uttiṇṇā bāhāhiṃ mae sudūra-parapārā /

kaha chammāsaṃ dhariyā bhukkhiya-tisieṇ' udaya-dhārā // HaDh_1.34 //

aha bhaṇai Kaṃḍarīo jaṃ summai Bhārahe purāṇe ya /

taṃ jai savvaṃ saccaṃ to saccaṃ tujjha vi ya vayaṇaṃ // HaDh_1.35 //

hatthī kamaṃḍalummī ahaṃ pi māo kahaṃ ti jaṃ bhaṇasi /

ettha diyāi-pasiddhaṃ vayaṇaṃ suṇa paccaya-ṇimittaṃ // HaDh_1.36 //

Baṃbhāṇassa muhāo vippā khattiya-jaṇo ya bāhāsu /

ūrūsu niggayā kira vaisā suddā ya pāesu // HaDh_1.37 //

Baṃbhāṇassa sarīre jai māo ettio jaṇa-samūho /

to kaha kamaṃḍalummī na māsi taṃ vaṇagaya-samaggo // HaDh_1.38 //

annaṃ ca Baṃbha-Viṇhū uḍḍhaṃ ca aho ya be vi dhāvaṃtā /

aṃtaṃ jassa na pattā vāsa-sahasseṇa divveṇa // HaDh_1.39 //

liṃgaṃ mahappamāṇaṃ kaha māyaṃ tass' Umā-sarīrammi /

evaṃ jai kuṃḍiyāe hatthī māo tti ko doso // HaDh_1.40 //

annaṃ ca imaṃ suvvai risiṇā Vāseṇa Bhārahe 'bhihiyaṃ /

jaha veṇu-pavva-majjhe Kīyaga-bhāiya-sayaṃ jāyaṃ // HaDh_1.41 //

kīo vaṃso bhaṇṇai tahiṃ jāyā Kīyaga tti bhaṇṇaṃti /

kaha tesiṃ uppattī Virāḍa-rāy'agga-mahisīe // HaDh_1.42 //

tīe vi natthi putto to sā risi-āsamammi risim ekkaṃ /

ārāhiuṃ payattā teṇa vi so sāhio caruo // HaDh_1.43 //

bhaṇiyā teṇa ya risiṇā eyaṃ caruyaṃ tumaṃ kuḍaṃgammi /

bhuṃjāhi pahiṭṭha-maṇā hohī te tattha putta-sayaṃ // HaDh_1.44 //

sā taṃ paribhuttuṃ je vaṃsa-kuḍaṃgammi to gayā sagihaṃ /

kassai kālassa tahiṃ Gaggali-ṇāmo risivaro tti // HaDh_1.45 //

vaṃsī-jāla-paviṭṭho carai tavaṃ navari tattha pauma-sare /

accharasā ṇhāyaṃtī risiṇā diṭṭhā vigaya-vatthā // HaDh_1.46 //

khuhiyassa sukka-biṃduṃ paḍiyaṃ nālīĕ Kīyago paḍhamo /

nava-ṇāya-sahassa-balo saṃjāo paḍhama-biṃdummi // HaDh_1.47 //

jaha jaha nijjhāi muṇī accharasaṃ pavara-rūva-lāvannaṃ /

taha taha khirai ya bīyaṃ jāyaṃ tahiṃ Kīyagāṇa sayaṃ // HaDh_1.48 //

vaṃsī-ṇālīŏ risī nikkhiviuṃ niyayam ālayaṃ patto /

so cciya vaṃsa-kuḍaṃgaṃ rāyā rakkhāvae niccaṃ // HaDh_1.49 //

saṃjāya-savva-gattā gahiyā devīĕ tuṭṭha-maṇasāe /

taṃ tīe putta-sayaṃ bhaṇṇai nālī-samuppannaṃ // HaDh_1.50 //

jai vaṃsa-samuppannaṃ bhāya-sayaṃ Kīyagāṇa māi tahiṃ /

to kaha kamaṃḍalummī na māsi taṃ vaṇagaya-samaggo // HaDh_1.51 //

vāsa-sahassaṃ Gaṃgā jaḍāsu vāmohiyā jai hareṇaṃ /

chammāsaṃ kuṃḍiyāe vimohio vaṇagao saccaṃ // HaDh_1.52 //

laggo vāl'agg'aṃte hatthī ahayaṃ ca niggao kaha nu /

jaṃ bhaṇasi taṃ suṇejjasu purāṇa-sui-āgayaṃ vayaṇaṃ // HaDh_1.53 //

Viṇhū jagassa kattā so kira eg'aṇṇavammi logammi /

āgāsa-bhūmi-māruya-tasa-thāvara-jalaṇa-rahiyammi // HaDh_1.54 //

naṭṭha-ṇarāsura-tirie tārā-sasi-sūra-virahie loe /

tappai tavaṃ Aṇaṃto jala-sayaṇa-gao aciṃt'appā // HaDh_1.55 //

tassa kira paṃkaya-ttho Baṃbho nāhīĕ pauma-gabbhāo /

daṃḍa-kamaṃḍalu-hattho viṇiggao paṃkayaṃ laggaṃ // HaDh_1.56 //

evaṃ kamaṃḍalu-gīvāĕ niggao jai tumaṃ gaya-samaṃ pi /

hatthī vāl'agg'aṃte laggo to ettha kim ajuttaṃ // HaDh_1.57 //

(Antyavipulā)

jaṃ pi ya bhaṇasi guṇāgara kuṃḍiya-gīvāĕ niggao kim ahaṃ /

Bhāraha-pasiddham ettha vi vayaṇaṃ suṇa paccaya-ṇimittaṃ // HaDh_1.58 //

divvaṃ vāsa-sahassaṃ Baṃbhāṇo tappaī tavaṃ raṇṇe /

to khuhiyā tiyasa-gaṇā bhaṇaṃti kaha hojja se vigghaṃ // HaDh_1.59 //

to bhaṇai suravar'Iṃdo thī-lolo Pasuvaī-vivāhammi /

aggīkamma-ṇiutto daṭṭhūṇa Umaṃ lhasiya-celaṃ // HaDh_1.60 //

khuhio bīya-ṇisaggaṃ karei vihuṇai niyaṃsaṇaṃ tāhe /

paḍiyaṃ bīyaṃ kalase Doṇāyario samuppanno // HaDh_1.61 //

erisiya-itthiyāhiṃ eso khubbhejja rūva-kaliyāhiṃ /

ko itthīhiṃ na khuhio muttūṇa jiṇaṃ Mahāvīraṃ // HaDh_1.62 //

Goyama-Vasiṭṭha-Pārāsaro ya Jamayaggi-Kāsavo-'gatthī /

ahayaṃ ca surāhivaī Haro Harī tihuyaṇa-variṭṭhā // HaDh_1.63 //

(Ādivipulā)

anne vi evam āī tava-satta-ṇihī jayammi vikkhāyā /

Vammaha-bāṇābhihayā itthīhiṃ karāviyā āṇaṃ // HaDh_1.64 //

tā gaṃtūṇaṃ sigghaṃ Tilottamā uttamā sura-vahūṇaṃ /

khoheu tava-visiṭṭhaṃ iṭṭheṇa Piyāmahaṃ vihiṇā // HaDh_1.65 //

to sā saṃgaya-vesā tiyasāhiva-vayaṇa-gahiya-saṃdesā /

gaṃtuṃ vibhussa purao divvaṃ naṭṭaṃ payāsei // HaDh_1.66 //

jahaṇ'uvvahaṇa-bhamirayā ucchāliya-hāra-maṃthar'ucchohā /

ghaṇa-masiṇ'aṃsiya-thaṇahara-m-ukkaṃpiya-pelava-dugullā // HaDh_1.67 //

laliya-paṇay'aṃgalaṭṭhī sakaḍakkh'ubbheya-bhuya-layā-juyalā /

rehai paṇaccamāṇī pavaṇeriya-Caṃpaya-laya vva // HaDh_1.68 //

daṭṭhūṇa naccamāṇiṃ Baṃbhā eg'iṃdio vva saṃvutto /

nijjhāi aṇimis'accho ses'iṃdiya-mukka-vāvāro // HaDh_1.69 //

nāūṇa tassa bhāvaṃ to sā saṃgaya-maṇohara-suvesā /

vivihāharaṇa-vihūsā dakkhiṇapāse ṭhiyā Vihuṇo // HaDh_1.70 //

to taṃ apecchamāṇo Baṃbhāṇo maṇasi maṇasijābhihao /

taṃ daṭṭhūṇa sataṇho karei bīyaṃ tao vayaṇaṃ // HaDh_1.71 //

etto 'vareṇa taiyaṃ cautthayaṃ kuṇai uttareṇaṃ so /

uḍḍhaṃ uppaiyāe paṃcama-vayaṇaṃ uvari-huttaṃ // HaDh_1.72 //

to tassa pamattassa ya Tilottamāgaya-maṇassa Ruddeṇaṃ /

taṃ vayaṇaṃ paṃcamayaṃ naheṇa ukkhuṃṭiyaṃ sahasā // HaDh_1.73 //

to Baṃbhā parikuvio dāhiṇa-hattha-ppaesiṇīe u /

uvvaṭṭei nilāḍe asarisa-ros'uṭṭhiyaṃ seyaṃ // HaDh_1.74 //

tatth' uppanno see balavaṃto Seyakuṃḍalī nāma /

Baṃbheṇ' āṇatteṇaṃ ukkhitto Saṃkaro teṇaṃ // HaDh_1.75 //

to so bhaya-saṃbhaṃto nāsaṃto Bayariyāsame patto /

tattha Harī niyamattho bhikkhaṃ dehi tti saṃlatto // HaDh_1.76 //

tā teṇa takkhaṇaṃ ciya mukka-sirā appaṇo nilāḍammi /

Baṃbhāṇa-sira-kavālaṃ Ruddeṇa samuḍḍiyaṃ heṭṭhe // HaDh_1.77 //

vāsa-sahasseṇa vi taṃ na bharijjai tīĕ ruhira-dhārāe /

taṃ ruhiram aṃgulīe Pasuvaiṇā ḍohiyaṃ navariṃ // HaDh_1.78 //

Baṃbhāṇa-sira-kavāle Kesava-ruhir'aṃgulīĕ Ruddassa /

to Rattakuṃḍaliṇaro tiṇhaṃ saṃjogao jāo // HaDh_1.79 //

so Ruddeṇ' āṇatto pajujjhio Seyakuṃḍalīĕ samaṃ /

jujjhaṃtāṇaṃ tāṇaṃ vāsa-sahassaṃ aikkaṃtaṃ // HaDh_1.80 //

to geṇhiūṇa donni vi savvehi suravarehiṃ miliehiṃ /

dinno Sakkassa Naro Sūrassa samappio bīo // HaDh_1.81 //

bhaṇiyā Bhāraha-kāle Bhāraha-jujjhassa kāraṇ'aṭṭhāe /

Bharah'avayāra-kāle uvaṇijjaha maṇuya-loyammi // HaDh_1.82 //

to kāle saṃpatte Sūro Kuṃtīĕ rūva-ummatto /

kaya-saṃjoo tīe kucchīĕ jaṇei taṃ gabbhaṃ // HaDh_1.83 //

sannaddha-baddha-kavao Kuṃtī-kaṇṇeṇa niggao Kaṇṇo /

to kiṃ tumaṃ na nīsarasi kuṃḍi-gīvāĕ Mūlasirī // HaDh_1.84 //

(Antyavipulā)

Gaṃgā aṇora-pārā kaham uttiṇṇa tti bhaṇasi me jaṃ tu /

ettha vi paccaya-jaṇaṇaṃ suṇehi Rāmāyaṇe vittaṃ // HaDh_1.85 //

Sīyā-pautti-heuṃ Pavaṇa-suo Rāhaveṇa āṇatto /

Laṃkā-puriṃ aigao bāhāhiṃ mahoyahiṃ tariuṃ // HaDh_1.86 //

diṭṭhāe Sīyāe piya-paḍivattiṃ suṇittu tuṭṭhāe /

bhaṇio kaha te uyahī tiṇṇo Haṇuyaṃta so bhaṇai // HaDh_1.87 //

bhavati cātra ślokaḥ:

tava prasādāt tava ca prasādād bhartuś ca te devi tava prasādāt /

sādhūnate yena pituḥ prasādāt tīrṇo mayā goṣpadavat samudraḥ //

(Upajāti)

jai teṇa samuttiṇṇo tirieṇa mahoyahī duruttāro /

to kiṃ tae nar'uttama na hojja Gaṅgā samuttiṇṇā // HaDh_1.88 //

jaṃ bhaṇasi kaha nu Dhārā chammāsā dhāriyā sireṇa mae /

ettha vi me suṇa heuṃ diyāi-sui-āgayaṃ vayaṇaṃ // HaDh_1.89 //

loga-hiy'aṭṭhāe kira Gaṃgā abbhatthiyā suravarehiṃ /

avayarasu maṇuya-loyaṃ saggāo bhaṇai sā tāhe // HaDh_1.90 //

ko maṃ dhariuṃ sakko nivaḍaṃtiṃ bhaṇai Pasuvaī ahayaṃ /

dhāremi tao paḍiyā dhariyā sīseṇa Pasuvaiṇā // HaDh_1.91 //

divvaṃ vāsa-sahassaṃ jai dhariyā Jaṇhavī Umā-vaiṇā /

to kaha na dharesi tumaṃ chammāsaṃ sireṇ' udaya-dhārā // HaDh_1.92 //

uttama-puriso si tumaṃ vinnāṇ'āgama-guṇehiṃ saṃpuṇṇo /

niggaya-jaso mahappā vikkhāo jīva-loyammi // HaDh_1.93 //

____________________________________________________

aisaio Mūlasirī Kaṃḍariyaṃ bhaṇai bhaṇasu ettāhe /

jaṃ diṭṭhaṃ jaṃ ca suyaṃ aṇuhūyaṃ jaṃ ca te ihaiṃ // HaDh_2.1 //

aha bhaṇai Kaṃḍarīo aviṇaya-puṇṇo mi āsi bālatte /

ammā-pii-duddaṃto roseṇa gharāŏ nikkhaṃto // HaDh_2.2 //

parihiṃḍaṃto ya ahaṃ patto des'aṃta-saṃṭhiyaṃ gāmaṃ /

go-mahisa-ajā-elaya-khara-karaha-samāulaṃ muiyaṃ // HaDh_2.3 //

ārām'ujjāṇa-vaṇehiṃ sohiyaṃ kusuma-phala-samiddhehiṃ /

Ayalāpuri-sāricchaṃ bahu-ghara-saya-saṃkulaṃ rammaṃ // HaDh_2.4 //

(Ādivipulā)

tassa bahumajjha-dese pecchaṃ Vaḍapāyavaṃ maṇ'abhirāmaṃ /

meha-ṇiuraṃba-bhūyaṃ sauṇa-sahassāṇa āvāsaṃ // HaDh_2.5 //

tassa ya heṭṭhe jakkho kamaladal'akkho guṇehiṃ parikiṇṇo /

sannihiya-pāḍihero dei varaṃ so vara-tthīṇaṃ // HaDh_2.6 //

jakkhassa tassa jattā vaṭṭai bahujaṇa-samāulā muiyā /

tatth' ei jaṇo muio dhūva-balī-puppha-hattha-gao // HaDh_2.7 //

ṇhāya-pasāhiya-jimio savvālaṃkāra-bhūsiya-sarīro /

nāṇāviha-vattha-dharo caṃdaṇa-parivaṇṇaga-vilitto // HaDh_2.8 //

to haṃ sakouhallo uvāgao taṃ mahāyaṇa-samūhaṃ /

jakkhassa kame namiuṃ ramamāṇe ghoḍahe pecchaṃ // HaDh_2.9 //

sannaddha-baddha-kavayā gahiy'āuha-paharaṇā ya aibahulā /

kalayala-ravaṃ kareṃtā paḍiyā corā navari tattha // HaDh_2.10 //

to so sabāla-vuḍḍho sa-itthio jaṇavao sapasuvaggo /

aha ghoḍaehiṃ sahio vāluṃkaṃ aigao savvo // HaDh_2.11 //

tattha vi te ghoḍahae ramaṃta-pecchā jaṇe ya muiya-maṇe /

corā vi paḍiṇiyattā naṭṭho gāmo tti jaṃpaṃtā // HaDh_2.12 //

navari tahiṃ pasuvaggo caramāṇo āgao suvīsattho /

ekkāĕ pasūĕ tao oiliyaṃ cibbhaḍaṃ sahasā // HaDh_2.13 //

sā ayagareṇa ghatthā so vi ya ḍheṃkīĕ navari oilio /

sā tatth' eva nilīṇā tuṃge Vaḍapāyave viule // HaDh_2.14 //

tassa ahe khaṃdhāro navari ṭhio rāiṇo ya matta-gao /

ḍheṃkī-pāe jamio Vaḍa-pāroho tti kāūṇa // HaDh_2.15 //

āuṃciyammi pāe kaḍḍhijjai gayavaro gulaguliṃto /

to ravai meṃṭha-vaggo keṇāvi gao samukkhitto // HaDh_2.16 //

soūṇa tāṇa saddaṃ saṃpattā saddavehiṇo johā /

isu-cāva-gahiya-hatthā kalayala-rāvaṃ karemāṇā // HaDh_2.17 //

chinnā ya tīĕ paṃkhā se sīsaṃ hatthiehiṃ dakkhehiṃ /

sā vilavaṃtī paḍiyā pavvaya-sihara vva mahi-vaṭṭhe // HaDh_2.18 //

phālāviyā ya rannā poṭṭe diṭṭho ya ayagaro viulo /

sagaḍassa īdaro viva khoḍī viva mahiyale paḍiyā // HaDh_2.19 //

aha bhaṇai nara-var'iṃdo phālijjau esa ayagaro viulo /

eyassa vi mā majjhe māṇusa-tiriyaṃ ca hojjāhi // HaDh_2.20 //

aha phāliyammi uyare diṭṭhā sā chāliyā mahākāyā /

tīe vi uyara-majjhe ramaṇijjaṃ cibbhaḍaṃ diṭṭhaṃ // HaDh_2.21 //

hī hī aho mahallaṃ ti cibbhaḍaṃ jāva jaṃpae rāyā /

to ghoḍayā vi ramiuṃ navari ṭhiy'āojja-vaṃsa-karā // HaDh_2.22 //

(Ādivipulā)

niggaṃtuṃ ca pavatto vālukkāo tao jaṇa-samūho /

jaha salabhāṇa ya seṇā reppha-bilāo viṇikkhamai // HaDh_2.23 //

namiūṇa nara-var'iṃdaṃ to so sacauppao jaṇo savvo /

niya-ṇiya-ṭhāṇāiṃ gao ahaṃ pi patto imaṃ nayariṃ // HaDh_2.24 //

eyaṃ me aṇubhūyaṃ paccakkham ih' eva māṇuse loe /

jo me na pattiyāyai dhuttāṇaṃ deu so bhuttiṃ // HaDh_2.25 //

aha bhaṇai Elasāḍho pattijjāmo na kiṃci saṃdeho /

paḍibhaṇai Kaṃḍarīo gāmo kaha cibbhaḍe māo // HaDh_2.26 //

paḍibhaṇai Elasāḍho purāṇa-Bhāraha-suīsu diṭṭh'attho /

kiṃ tuha Viṇhupurāṇaṃ kaṇṇa-sui-pahaṃ na pattaṃ te // HaDh_2.27 //

puvviṃ āsi jagam iṇaṃ paṃcamahābhūya-vajjiyaṃ gahiraṃ /

eg'aṇṇavaṃ jaleṇaṃ mahappamāṇaṃ tahiṃ aṃḍaṃ // HaDh_2.28 //

vīī-paraṃpareṇaṃ gholaṃtaṃ acchiuṃ sucira-kālaṃ /

phuṭṭaṃ dubhāga-jāyaṃ addhaṃ bhūmīĕ saṃvuttaṃ // HaDh_2.29 //

tattha surāsura-ṇāraya-maṇuya-cauppaya-mayaṃ jayaṃ savvaṃ /

jai māyaṃ tā gāmo kaha nu na māejja vāluṃke // HaDh_2.30 //

annaṃ ca imaṃ suvvai Araṇīpavvammi Dhammaputtassa /

kahiyaṃ suyam-aṇubhūyaṃ Makkaṃḍeṇaṃ ca anna-jue // HaDh_2.31 //

so kila jug'aṃta-samae uyaeṇ' eg'aṇṇavī-kae loe /

vīī-paraṃpareṇaṃ gholiṃto uyaya-majjhammi // HaDh_2.32 //

pecchai gaya-tasathāvara-paṇaṭṭha-sura-ṇara-tirikkhajoṇīyaṃ /

eg'aṇṇavaṃ jagam iṇaṃ paṃcamahābhūya-pabbhaṭṭhaṃ // HaDh_2.33 //

evaṃ-vihe jagammī pecchai Naggohapāyavaṃ aha so /

Maṃdaragiri vva tuṃgaṃ mahāsamuddaṃ va vitthiṇṇaṃ // HaDh_2.34 //

khaṃdhammi tassa sayaṇaṃ acchai tahiṃ bālao maṇ'abhirāmo /

saṃpuṇṇa-sarīr'uyao miu-maddava-kuṃciya-sueso // HaDh_2.35 //

hattho pasārio se risiṇā eh'ehi vaccha bhaṇio ya /

khaṃdhe mamaṃ vilaggasu mā marihisi uyaya-vāhīe // HaDh_2.36 //

teṇa ya ghettuṃ hattho oilio so risī tao tassa /

pecchai uyarammi jayaṃ sasela-vaṇa-kāṇaṇaṃ savvaṃ // HaDh_2.37 //

divvaṃ vāsa-sahassaṃ kucchīe so risī paribhamaṃto /

aṃtaṃ na c'eva patto viṇiggao risivaro tatto // HaDh_2.38 //

jai dārayassa uyare sasurāsura-māṇusaṃ jayaṃ māyaṃ /

to cibbhaḍammi gāmo kaha nu na māejja Kaṃḍariya // HaDh_2.39 //

ḍheṃkoyare ayagaro tassa pasūe ya cibbhaḍaṃ uyare /

tattha vi ya jaṇa-samūho kaha māo bhaṇasi suṇasu imaṃ // HaDh_2.40 //

muṭṭhī-gejjha-sumajjhāĕ Kesavo Devaīĕ kucchimmi /

vutto tassa ya uyare sasela-vaṇa-kāṇaṇā puhaī // HaDh_2.41 //

(Ādivipulā)

aha bhaṇai Kaṃḍarīo cibbhaḍa-pasu-ayagar'āi-majjhammi /

acchaṃto kaha na mao eyaṃ me pattiyāveha // HaDh_2.42 //

bhaṇai ya Elāsāḍho taddiyasaṃ c'eya niggao taṃ si /

puhaī kaha na vivajjai Vasudeva-suyassa poṭṭa-tthā // HaDh_2.43 //

poṭṭe kisi-vāṇijjaṃ saṃgāmā bahuvihā ya āraṃbhā /

āvāha-vivāhā vi ya ussava-pasavā ya vaṭṭaṃti // HaDh_2.44 //

kaha puṇa havejja eyaṃ jayaṃ tu uyare vi jassa jaṃ vutthaṃ /

Baṃbhāṇa-Kesavāṇaṃ puvviṃ kira bhaṃḍaṇaṃ āsi // HaDh_2.45 //

kattā ahaṃ ti Baṃbhā bhaṇai jao vayaṇa-bāha-ūrūhiṃ /

pāesu ya nikkhaṃtaṃ cāuvvaṇṇaṃ jagam iṇaṃ ti // HaDh_2.46 //

paḍibhaṇai taṃ Aṇaṃto Baṃbhāṇaṃ saparihāsa-vayaṇehiṃ /

taṃ si mama ceḍa-rūvaṃ na jujjae erisaṃ vottuṃ // HaDh_2.47 //

abbhā-bhūmiya-oṭṭhe pavvaya-dāḍhe samudda-jīhāle /

pavisehi majjha uyare jā peccha savibbhamaṃ puhaiṃ // HaDh_2.48 //

maha c'eva samuppanno jala-sayaṇe nāhi-ṇiggae paume /

Baṃbhāṇa taṃ na sohasi guru-purao ettiyaṃ vottuṃ // HaDh_2.49 //

avi ya

jassa pabhāveṇ' ummilliyāiṃ taṃ c'eva kaha kayagghāiṃ /

kumuyāiṃ atta-saṃbhāviyāiṃ caṃdaṃ uvahasaṃti // HaDh_2.50 //

(Mahāvipulā)

aha bhaṇai Kaṃḍarīo porāṇa-suīsu kattha ya suyaṃ te /

ḍheṃkī mahappamāṇā jass' uyare ettiyaṃ māyaṃ // HaDh_2.51 //

paribhaṇai Elasāḍho Dovai-devī-sayaṃvare pattā /

jaha kira dhaṇuṃ paviṭṭhā Mahihara-ṇāgā ya Aggī ya // HaDh_2.52 //

Dupaya-ṇar'iṃdassa dhaṇuṃ sumahallaṃ devayā-pariggahiyaṃ /

jo āruhio viṃdhai vāme acchimmi sūyariyaṃ // HaDh_2.53 //

jijjai kalāsu kusalā kira kaṇṇā tassa Dovaī souṃ /

rāyāṇo taṃ dhaṇuhaṃ āruhiuṃ to samāḍhattā // HaDh_2.54 //

na cayaṃti āruheuṃ aha Sasipālo mahābalo tāhe /

saṃdheūṇa payatto navari dhaṇuṃ taṃ ayatteṇaṃ // HaDh_2.55 //

to Kaṇheṇaṃ tāhe Garulo nāgā gayā ya saṃkhā ya /

cakkaṃ naṃgala-musalaṃ Maṃdara-Merū ya pakkhittā // HaDh_2.56 //

saṃdhei to vi jāhe tā Sasi-Sūr'Aggi-uyahi-selā ya /

pakkhittā savva cciya Vasuhā aha dhaṇu-hare tammi // HaDh_2.57 //

addh'aṃgula-mette kira asaṃdhie Kesaveṇa bāṇaṃ so /

pāeṇa vi moyaviuṃ tāhe paḍio saha-dhaṇū ṇaṃ // HaDh_2.58 //

Pattheṇa ya taṃ gahiyaṃ aha aibhāreṇa na sahaī dharaṇī /

Bhīmassa tao hatthe āruhiyaṃ taṃ payatteṇa // HaDh_2.59 //

kaṇṇa-vidiṇṇeṇa sareṇa viṃdhiuṃ Ajjuṇeṇa taṃ rāhaṃ /

laddhā Dovai-kannā vīra-paḍāgaṃ haraṃteṇa // HaDh_2.60 //

(Ādivipulā)

jai taṃ mahalla-dhaṇuyaṃ nāg'Aggi-gayā ya aigayā jattha /

to kaha na hoi ḍheṃkī mahaī jatth' ettiyaṃ māyaṃ // HaDh_2.61 //

Rāmāyaṇe vi suvvai Sīyā-haraṇe Jaḍāu-giddho tti /

paṃkh'āuho mahappā jujjheṇaṃ Rāmaṇassa ṭhio // HaDh_2.62 //

teṇa vi se ruṭṭheṇaṃ Caṃdāhāseṇa lūḍiyā paṃkhā /

to luya-paṃkho paḍio Maṃdara-siharo vva mahi-vaṭṭhe // HaDh_2.63 //

Sīyāe so bhaṇio sīlavaīṇaṃ saīṇa teeṇaṃ /

daṭṭhūṇa Rāma-dūyaṃ hohiṃti puṇo vi te paṃkhā // HaDh_2.64 //

kassai kālassa tao Haṇuyaṃto Rāhaveṇa āṇatto /

Sīyā-pautti-heuṃ hiṃḍaṃto āgao tahiyaṃ // HaDh_2.65 //

ciṃtei ya Haṇuyaṃto aho girī esa unnao 'īva /

etth' āruhiūṇa ahaṃ pulaemi samaṃtao vasuhaṃ // HaDh_2.66 //

saṃlatto ya khageṇaṃ ko 'si tumaṃ eriseṇa veseṇa /

so bhaṇai Rāma-dūo ahaṃ ti Sīyaṃ gavesāmi // HaDh_2.67 //

bhaṇio Jaḍāuṇā so Rāma-vahū Rāvaṇeṇa vilavaṃtī /

telokka-ḍāmareṇaṃ Laṃkāpura-paṭṭaṇaṃ nīyā // HaDh_2.68 //

mā bhamasu araṇṇāiṃ Sīyā-devīĕ maggaṇ'aṭṭhāe /

Daharaha-suyassa sigghaṃ gaṃtūṇa piyaṃ niveehi // HaDh_2.69 //

aham avi Sīy'aṭṭhāe jujjhaṃto nisiyarāhiveṇ' evaṃ /

asiṇā duve vi paṃkhe chettūṇa ajaṃgamo mukko // HaDh_2.70 //

aha bhaṇai Vāu-putto jaṃ si ṭhio Rāvaṇassa jujjheṇa /

jaṃ vā vi amha kahiyaṃ hohi tti tumaṃ pi piyabhāgī // HaDh_2.71 //

soūṇa dūya-vayaṇaṃ to se jāyā puṇaṇṇavā paṃkhā /

āyāseṇ' uppaio gao ya saggaṃ niruvasaggaṃ // HaDh_2.72 //

bhavati cātra ślokaḥ:

ākhyāsyati khagaḥ svarge pitur Daśarathasya me /

ekastrīparipālye 'pi na Rāmaḥ śaktum arhati // HaDh_2.73 //

Maṃdara-sihar'āgāro jai āsi Jaḍāu khahayaro giddho /

tā kaha na hoi ḍheṃkī Kaṃḍariya mahappamāṇāo // HaDh_2.74 //

Elāsāḍheṇ' evaṃ Kaṃḍario jaṃpio bhaṇai tāhe /

Elāsāḍha iyāṇiṃ kahehi jaṃ te samaṇubhūyaṃ // HaDh_2.75 //

____________________________________________________

aha bhaṇai Elasāḍho ahayaṃ taruṇattaṇe daviṇa-buddhī /

dhāuvvāya-pisāeṇa bhāmio paribhamāmi jagaṃ // HaDh_3.1 //

(Antyavipulā)

ettha bilaṃ ettha raso eso so pavvao jahiṃ dhāū /

evaṃ lakkha-gaeṇaṃ naḍijjamāṇo paribhamāmi // HaDh_3.2 //

laddho ya āgamo me jaha puvva-disāĕ joyaṇa-sahasse /

navaraṃ gaṃtūṇa giriṃ sahassavehī raso tahiyaṃ // HaDh_3.3 //

joyaṇa-vitthiṇṇāe silāĕ taṃ rasa-bilaṃ samucchannaṃ /

ukkhiviūṇa silaṃ so ghittavvo kaṇaya-kuṃḍāo // HaDh_3.4 //

āsā-pāsa-ṇibaddho joyaṇa-saiehiṃ kamehiṃ to ahaṃ /

gaṃtūṇa giri-paese ukkhiviya silaṃ rasaṃ gahiuṃ // HaDh_3.5 //

pariḍhakkiūṇa ya bilaṃ silāĕ to āgayaṃ imaṃ bhavaṇaṃ /

to jāo me vibhao Dhaṇaya-sariccho rasa-pasāyā // HaDh_3.6 //

aha paṇaiṇi-parikiṇṇo thuvvaṃto taha ya māgaha-saehiṃ /

vara-taruṇi-saṃpauttehiṃ nāḍaehiṃ ca gijjaṃto // HaDh_3.7 //

(Antyavipulā)

acchāmi vilasamāṇo accharasā-parigao Dhaṇavai vva /

tālāyara-māhaṇa-bhikkhuyāṇa dāṇaṃ payacchāmi // HaDh_3.8 //

(Antyavipulā)

to Dhaṇaya-vihava-sarisaṃ nāūṇa mamaṃ viṇiggaya-jasohaṃ /

corā sāmattheuṃ rattiṃ paḍiyā mama gihammi // HaDh_3.9 //

sannaddha-baddha-paṭṭehiṃ tehiṃ gahiy'āuha-ppahārehiṃ /

kaya-sīha-ṇāya-bolehiṃ veḍhiyaṃ majjha vara-bhavaṇaṃ // HaDh_3.10 //

(Mahāvipulā)

parisaṃciyassa atthassa kāraṇe maraṇam āgayaṃ tehiṃ /

sa-bhuya-bala-jjiyam atthaṃ na demi hariuṃ viciṃteuṃ // HaDh_3.11 //

(Ādivipulā)

sahasā ya uṭṭhio haṃ dhaṇuaṃ ghettūṇa sara-sahassaṃ ca /

to bhaṃḍaṇam āḍhattaṃ corāṇa mahaṃta-bhīsaṇayaṃ // HaDh_3.12 //

satt'aṭṭha-dasa-duvālasa ahayaṃ ekkeṇa sara-pahāreṇaṃ /

jatto valāmi tatto pesemi Jam'ālayaṃ core // HaDh_3.13 //

to corāṇa sayaṃ me muhutta-metteṇa ghāiyaṃ tahiyaṃ /

haya-sesā sayarāhaṃ paḍiyā majjhovariṃ savve // HaDh_3.14 //

to maṃ khaṃḍākhaṃḍiṃ kāuṃ sīsaṃ ca chinniuṃ majjha/

Bayarīe ṭhaviūṇaṃ musiūṇa gharaṃ gayā corā // HaDh_3.15 //

sa-ruhira-sa-kuṃḍalaṃ ciya sīsaṃ me Bayari-taruvar'ārūḍhaṃ /

vīsattham aṇuvviggaṃ khāyai bore kasakasassa // HaDh_3.16 //

taṃ sīsaṃ sūr'uyae diṭṭhaṃ loeṇa Bayari-uvarimmi /

bayarāiṃ khāyaṃtaṃ esa sa-jīo tti kāūṇa // HaDh_3.17 //

majjhaṃ aṃgovaṃgā jaṇeṇa piṃḍevi meliyā turiyaṃ /

jāo puṇo vi to 'haṃ niruvahaya-sarīra-lāyaṇṇo // HaDh_3.18 //

eyaṃ me aṇubhūyaṃ sayam eva imammi māṇuse loe /

jo puṇa na pattiyai maṃ dhuttāṇaṃ deu so bhuttiṃ // HaDh_3.19 //

bhaṇai Saso sabbhūyaṃ kaha sakkā bhāṇiuṃ aliyam eyaṃ /

jaṃ porāṇa-suīe Bhāraha-Rāmāyaṇe āyaṃ // HaDh_3.20 //

Jamayaggī āsi risī pattī tass' āsi Reṇuyā nāmaṃ /

tīe sīlavaīe namaṃti kusum'atthie rukkhā // HaDh_3.21 //

diṭṭho ya ṇāĕ rāyā Assāvahio maṇo ya se khuhio /

na namaṃti tao rukkhā tāhe Jamayaggiṇā Rāmo // HaDh_3.22 //

ruṭṭheṇa samāṇatto sīsaṃ chiṃdāhi duṭṭha-silāe /

teṇa vi sīsaṃ chinnaṃ jhaḍatti piu-vayaṇa-kāreṇa // HaDh_3.23 //

bhaṇai tao Jamayaggī varasu varaṃ putta jo tuhaṃ iṭṭho /

so bhaṇai majjha māyā puṇo vi jīvaṃtiyā hou // HaDh_3.24 //

iya hou tti pabhaṇie jāyā sā takkhaṇeṇa sajjīvā /

jai sabbhūyaṃ eyaṃ tumaṃ pi jīvo 'si taṃ saccaṃ // HaDh_3.25 //

rāyā vi Jarāsaṃdho samara-parakkama-payāva-vikkhāo /

so saṃdhio Jarāe rāya-sahassāhivo jāo // HaDh_3.26 //

annaṃ ca imaṃ suvvai Suṃda-Ṇisuṃdā sahoyarā sūrā /

bala-vīriya-saṃpannā sura-loya-bhayaṃ jaṇemāṇā // HaDh_3.27 //

sāmattheuṃ surehiṃ Tilottamā tesiṃ vaha-ṇimittaṃ tu /

nimmaviyā tila-mettaṃ ekk'ekka-surassa ghettūṇaṃ // HaDh_3.28 //

aṃgovaṃga-su-y-aṃgaya-lāvaṇṇa-guṇāgarā aṇovammā /

kamalāgara-vatthavvā Lacchi vva sayaṃ samuttiṇṇā // HaDh_3.29 //

viṇay'oṇāmiya-gattā sara-sāmala-vikaya-kamala-dala-ṇayaṇā /

namiūṇa sura-samūhaṃ mahur'ullāvā samullavai // HaDh_3.30 //

jaṃ kāyavvaṃ taṃ āṇaveha devehiṃ jaṃpiyaṃ iṇamo /

Suṃda-Ṇisuṃdā sura-sattha-kaṃṭayā te samuddharasu // HaDh_3.31 //

(Mahāvipulā)

iya hou tti ya bhaṇiuṃ Tilŏttamā geṇhiuṃ sur'āṇattiṃ /

pattā khaṇeṇa ya tahiṃ Suṃda-Ṇisuṃdāsurā jattha // HaDh_3.32 //

hār'addhahāra-keūra-bhūsiyā jaṇa-maṇ'ussava-bbhūyā /

vitthaḍ'unnaya-thaṇa-vaṭṭā do vi jaṇe te palobhei // HaDh_3.33 //

(Ādivipulā)

to te mayaṇa-vasagayā tīĕ kae jujjhiuṃ aha pavattā /

nihaṇaṃ ca gayā donni vi paropparaṃ sattha-ghāehiṃ // HaDh_3.34 //

bhavati cātra ślokaḥ

strīṇāṃ kṛte bhrātṛyugasya bhedaḥ saṃbandhibhede striya eva mūlam /

aprāptakāmā bahavo narendrā nārībhir utsādita-rājavaṃśāḥ // HaDh_3.35 //

(Indravajrā)

accharasā jai evaṃ Tilottamā nimmiyā sura-gaṇehiṃ /

to kaha tujjha vi aṃgā lāijjaṃtā na laggejjā // HaDh_3.36 //

annāṇ' aṃgāvayavā jai laggā saṃmilissiyā saṃtā /

to sasarīrāvayavā bhaṇasu tuhaṃ kiṃ na laggaṃti // HaDh_3.37 //

suvvai ya Pavaṇa-taṇao bālatte Aṃjaṇaṃ ti nāmeṇaṃ /

jaṇaṇiṃ pucchai ammo ko me chuhiyassa āhāro // HaDh_3.38 //

rattāiṃ vaṇa-phalāiṃ āhāro tujjha teṇa aha sūraṃ /

gahiuṃ samuṭṭhiyaṃ to teṇāvi tala-ppahāreṇaṃ // HaDh_3.39 //

saya-sikkaro kao so jaṇaṇī se daṭṭhuṃ taṃ paiṇṇ'aṃgaṃ /

bhattu-sayāse gaṃtuṃ vilavai sog'āurā kaluṇaṃ // HaDh_3.40 //

daṭṭhuṃ niyaya-kalattaṃ royaṃtiṃ bahuvihāiṃ kaṃdaṃtiṃ /

daṭṭhūṇa ya Haṇuyaṃtaṃ puttaṃ paraloya-saṃkaṃtaṃ // HaDh_3.41 //

to Pavaṇo parikuvio pāyāle pavisiuṃ ṭhio tāhe /

sa-surāsuraṃ jagam iṇaṃ pavaṇa-ṇiroheṇa ādannaṃ // HaDh_3.42 //

gaṃtuṃ ca tattha diṭṭho pasāio sura-varehiṃ so Pavaṇo /

aṃgāiṃ tassuyassa vi saṃghāeuṃ kaŏ sajīo // HaDh_3.43 //

ekkā ya tassa haṇuyā na ya diṭṭhā sura-varehiṃ savvehiṃ /

haṇuyāĕ esa anno Haṇuyaṃto to kao nāmaṃ // HaDh_3.44 //

jai saccaṃ Pavaṇa-suo khaṃḍākhaṃḍi-kao vi saṃmilio /

to kaha sakkā vottuṃ tujjha auvvaṃ vayaṇam eyaṃ // HaDh_3.45 //

Dasaraha-taṇaya-kahāe Sīyā-devīĕ haraṇa-saṃbaṃdhe /

seuṃ saṃdhāveuṃ Laṃkā-dīvaṃ gae Rāme // HaDh_3.46 //

Dasamuha-Rāma-balāṇaṃ doṇha vi bhaḍa-vāyayaṃ vahaṃtāṇaṃ /

saṃgāmammi palagge haṇahaṇaṃ sadd'āule ghore // HaDh_3.47 //

Maṃdoyari-daiya-bhaḍ'ukkaḍehiṃ n'egāiṃ vāṇara-sayāiṃ /

asi-parasu-addhacaṃda-ppahāra-chinn'aṃga-m-aṃgāiṃ // HaDh_3.48 //

(Ādivipulā)

sattī-pahara-ṇiruddhe mahiyali paḍiyammi Lakkhaṇa-kumāre /

Rāme sogābhihae vilavaṃte Pavaṇa-taṇaeṇa // HaDh_3.49 //

gaṃtuṃ Doṇa-girīo uvaṇīyā osahī jalaṃtīo /

nissallo tti pabhāvā jhaḍitti sattī vi nissariyā // HaDh_3.50 //

je nisiyara-kuddh'ugghāehiṃ samarammi abhihayā pavayā /

saṃchinna-bhinna-gattā te vi ya savve samāsatthā // HaDh_3.51 //

(Ādivipulā)

vivaiṇṇa-sarīrā vi ya jai savve vāṇarā samujjīyā /

khaṃḍa-sahasso kaŏ Elasāḍha to jīvasi tumaṃ pi // HaDh_3.52 //

(Antyavipulā)

annaṃ ca jaṇa-pagāsā nihiyā suya-putthaesu bahuesu /

kiṃ vā tumhehi imā na suyā Mahaseṇa-uppattī // HaDh_3.53 //

Himasela-guha-gayāiṃ do vi mahāmehuṇaṃ nisevaṃti /

divvaṃ vāsa-sahassaṃ Girisuya Sasibhūsaṇo c'eva // HaDh_3.54 //

taṃ soūṇa pauttiṃ devā kira tihuyaṇammi ādannā /

savv'āyareṇa miliuṃ gabbh'uvaghāyaṃ viciṃtaṃti // HaDh_3.55 //

suiraṃ sāmattheuṃ tihuyaṇa-ujjoya-kārao Jalaṇo /

mahur'akkhara-vayaṇa-payaṃpiehiṃ bhaṇio suragaṇehiṃ // HaDh_3.56 //

(Antyavipulā)

ekkassa vi tā kīrai kajjaṃ abbhatthiehiṃ jiya-loe /

kiṃ puṇa mahāṇubhāvo jaṃ jaṃpai sura-samūho tti // HaDh_3.57 //

jassa ya kaeṇa savve devā ciṃtovahiṃ samoiṇṇā /

tassa ya jatteṇa tumaṃ Huyavaha ekko samattho 'si // HaDh_3.58 //

pavisittu guhā-vivare Hara-purao appayaṃ payaṃsesu /

to tuha kayāi vilio mehuṇa-tattiṃ visajjejjā // HaDh_3.59 //

Vesāṇareṇa bhaṇiyaṃ ko dhāvai abhimuhaṃ muhuttaṃ pi /

iharā vi Umā-vaiṇo kiṃ puṇa eyārise bhāve // HaDh_3.60 //

nara-sira-kavāla-māl'āulassa khaṭṭaṃga-vagga-hatthassa /

jassa raī peya-vaṇe ko tassa jaṇo samalliyai // HaDh_3.61 //

(Ādivipulā)

jo Dāruvaṇe risi-āsamammi viṇiyaṃsaṇo palāyaṃto /

vahio uddhuya-liṃgo ko taṃ vivuho samālavai // HaDh_3.62 //

kiṃ bahuṇā jaṇa-majjhe jo naccai uddhieṇa liṃgeṇaṃ /

balavaṃto Vajjaharo tassa vi nissaṃsayaṃ bhāi // HaDh_3.63 //

jai kaha vi Sūlapāṇī kuppai Himagiri-guhā-paviṭṭhassa /

ko jāṇai kiṃ me hohii tti mā saṃkaḍe chuhaha // HaDh_3.64 //

(Antyavipulā)

etth'aṃtare ya bhaṇio sappaṇayaṃ Bahuyaloyaṇeṇ' evaṃ /

savva-surāṇaṃ vayaṇaṃ Huyavaha iṇamo nisāmehi // HaDh_3.65 //

mā bhāhi Umā-vaiṇo Huyavaha jeṇ' eriso Umā-satto /

gaya-turaya-purisa-damaṇo kiṃ ca imo āgamo na suo // HaDh_3.66 //

hatthī dammai saṃvacchareṇa māseṇa dammai turaṃgo /

mahilā puṇa kira purisaṃ damei ekkeṇa divaseṇaṃ // HaDh_3.67 //

(Ādivipulā)

jaṃ bhaṇai Umā-devī karei taṃ Pasuvaī akajjaṃ pi /

kiṃ vā dehāṇugayaṃ Umaṃ vahaṃto na diṭṭho te // HaDh_3.68 //

muṃcasu āsaṃkam iṇaṃ Ruddo ruṭṭho vi te sarīrassa /

na karei kiṃ pi pīḍaṃ Pavvai-cittāvarakkhāe // HaDh_3.69 //

iya hou tti ya Jalaṇo gaṃtuṃ Himavaṃtagiri-guhaṃ viulaṃ /

pecchai Tiuraṃtayaraṃ rai-kajja-samuggayam aīṇaṃ // HaDh_3.70 //

abbhāsatthaṃ daṭṭhuṃ Mahadevo uṭṭhio samārūḍho /

huṃ huṃ Umāĕ bhaṇio uddhuya-liṃgo 'ṇalaṃ bhaṇai // HaDh_3.71 //

uṭṭha(?) ni-y-aṃciya-vayaṇaṃ piba reyaṃ mā karehi vikkhevaṃ /

Ruddeṇa Huyavaho ghaḍaghaḍassa to pāio reyaṃ // HaDh_3.72 //

uyara-gaeṇa ya reeṇa so palitt'aggiṇā va ḍajjhaṃto /

muya-maraṇo saṃbhaṃto kaha kaha vi mahoyahiṃ patto // HaDh_3.73 //

(Ādivipulā)

dāūṇam aṃguliṃ Huyavaheṇa uggālio jale reo /

uggāliyammi ree tāhe Jalaṇo samāsattho // HaDh_3.74 //

tappabhiiṃ ciya summai jaṇa-sui-vāy'āgayaṃ imaṃ vayaṇaṃ /

reya-pabhāvā kira sāgarammi rayaṇāṇa uppattī // HaDh_3.75 //

(Antyavipulā)

lavaṇa-jalāo Aggī nīl'uppala-surahi-kamala-gaṃdh'aḍḍhaṃ /

saram egaṃ gaṃtuṃ je reya-visesaṃ samuggilai // HaDh_3.76 //

jaṃ bhaṇṇai Kittiya saha uyaṃ ti phuḍa-viyaḍa-pāyaḍaṃ tāo /

chakkira accharasāo taṃ pauma-saraṃ samoiṇṇā // HaDh_3.77 //

tā majjium āḍhattā tammi sare nayaṇa-maṇ'abhirāmammi /

majjaṃtīṇaṃ joṇīsu tāṇa bīyaṃ aṇupaviṭṭhaṃ // HaDh_3.78 //

(Antyavipulā)

pauma-sare majjittā puṇar avi tā jois'ālayaṃ pattā /

paidivasaṃ ciya tāsiṃ chaṇha vi parivaḍḍhae uyaraṃ // HaDh_3.79 //

kāl'aṃtareṇa keṇa ya samayaṃ ciya tā tahiṃ pasūyāo /

ekk'ekkam uttim'aṃgaṃ bāh'ūru-sarīra-ruṃḍāiṃ // HaDh_3.80 //

tā tā vi vimhiya-maṇā daṃsaṃti paroppar'ekka-m-ekkassa /

pecchasu accheram iṇaṃ logammi abhūya-puvvaṃ tu // HaDh_3.81 //

bāh'ūrū ya sarīraṃ sīsāṇi ya niyaya-ṇiyaya-ṭhāṇesu /

laggāiṃ takkhaṇa cciya Mahaseṇo chammuho jāo // HaDh_3.82 //

Komārabaṃbhayārī n'icchai maṇasā vi juvai-saṃjoyaṃ /

savva-jaṇammi pagāso dakkhiṇa-dese ṭhio raṇṇe // HaDh_3.83 //

causu ya disāsu jahiyaṃ dhāvai logo bhavaṃtara-dis'aṭṭhā /

sīseṇa ya chammāsaṃ dharei Dhāraṃ bar'aṭṭhāe // HaDh_3.84 //

jai Mahaseṇ'aṃgāiṃ piha-gabbha-viṇiggayāiṃ laggāiṃ /

to tujjha na laggejjā tāiṃ kim eg'uyara-vatthāiṃ // HaDh_3.85 //

chinnā nāsā kaṇṇo ya laggae loya-viiyam eyaṃ pi /

paramāṇu-pamāṇāo pagaṃpio laggasi tumaṃ pi // HaDh_3.86 //

(Ādivipulā)

to bhaṇai Elasāḍho puriso kaha chinnaeṇa sīseṇaṃ /

bhukkh'atto bayarāiṃ khāeuṃ sakkae kaha nu // HaDh_3.87 //

bhaṇai Saso Rāhū kira sīsa-cchinno jayammi sui-vāo /

taha viya gayaṇe hiṃḍai ābhaṃsai caṃda-sūre ya // HaDh_3.88 //

aha bhaṇai Elasāḍho kaha gammai taṃ vigiṭṭham addhāṇaṃ /

kaha vā vi joyaṇa-sayaṃ kamehiṃ akkamai bhūmīe // HaDh_3.89 //

paḍibhaṇai Saso janne Balissa Viṇhū diyāi-veseṇa /

tiṇṇi kame jāittā harai sa-selaṃ vasumaiṃ so // HaDh_3.90 //

jai savvā vi vasumaī tiṇṇi na puṇṇā kame Mahumahassa /

ko doso jai tujjhaṃ ekka-kamo joyaṇa-sayaṃ tu // HaDh_3.91 //

puṇar avi Elāsāḍho bhaṇai silā sā mae aimahallā /

kaha ukkhittā garuyā eyaṃ me pattiyāvehi // HaDh_3.92 //

bhaṇai Saso kiṃ na suyaṃ tumae Rāmāyaṇe kahijjaṃtaṃ /

Rāmassa Rāvaṇassa ya saṃgāme vaṭṭamāṇammi // HaDh_3.93 //

Lakkhaṇakumāra-paḍaṇe Haṇueṇaṃ Doṇa-pavvao tuṃgo /

osahi-maggaṃteṇaṃ sa-mūla-ḍālo samukkhitto // HaDh_3.94 //

mahai-silā-saṃghāo selo jai vāṇareṇa ukkhitto /

joyaṇa-pamāṇa-mettaṃ ukkhivasi silaṃ na saṃdeho // HaDh_3.95 //

loe vi payarai suī vaḍḍhaṃtī meiṇī Mahumaheṇaṃ /

kāuṃ varāha-rūvaṃ sa-sela-vaṇa-kāṇaṇā dhariyā // HaDh_3.96 //

jai teṇa samukkhittā na najjaī katthaī ṭhieṇaṃ ti /

ukkhivasi tā tumaṃ pi ya dharaṇiyala-ttho silā do vi // HaDh_3.97 //

Elāsāḍho jāhe Saseṇa aisaṃdhio bhaṇai tāhe /

jaṃ te suyam aṇubhūyaṃ kahehi savvaṃ aparisesaṃ // HaDh_3.98 //

____________________________________________________

aha bhaṇai Saso ahayaṃ niyayaṃ chettaṃ gao saraya-kāle /

gāmāo dūratthaṃ taṃ chettaṃ Girivar'āsanne // HaDh_4.1 //

chettammi ya acchaṃto tatto Pavvayavarāŏ oyariuṃ /

ucchitto mi gaeṇaṃ pavvaya-metteṇa matteṇa // HaDh_4.2 //

tharatharatharaṃta-gatto hāhā gahio maeṇa ciṃtaṃto /

vivalāium acayaṃto paribhamami tahiṃ tahiṃ c'eva // HaDh_4.3 //

bhī-uvviggeṇa mae diṭṭho tila-pāyavo aimahallo /

tattha vilaggo mi ahaṃ vaṇagaya-bhaya-vevira-sarīro // HaDh_4.4 //

patto ya so vaṇagao ārusio tila-dumaṃ samaṃteṇaṃ /

paribhamai gulaguliṃto kulāla-cakkaṃ vva āiṭṭho // HaDh_4.5 //

teṇa bhamaṃteṇa ya so cālijjaṃto tile davadavassa /

vāsāsu jala-haro iva jala-ṇivahaṃ muṃcaī ghoraṃ // HaDh_4.6 //

tila-cakkeṇa vva tilā te savve pīliyā gayavareṇaṃ /

tattha pavūḍhā sariyā telloyā nāma nāmeṇaṃ // HaDh_4.7 //

khutto ya vaṇagao so khala-calaṇīe ya tella-paṃkammi /

āraḍiūṇa ya virasaṃ bhukkhiya-tisio mao hatthī // HaDh_4.8 //

gaya-bhaya-saṃtatta-maṇo ahayaṃ puṇa-jāyao tti mannaṃto /

kahakaha vi tila-dumāo divas'avasāṇe samoiṇṇo // HaDh_4.9 //

kusio diiṃ ca kāuṃ bhario tellassa so mae hatthī /

tāhe dasa tella-ghaḍe pāuṃ bhakkhemi khala-bhāraṃ // HaDh_4.10 //

tellassa supaḍipuṇṇaṃ taṃ diiyaṃ geṇhiuṃ gao gāmaṃ /

gāma-bahiṃ taṃ diiyaṃ pāyava-sāhāĕ nikkhiviuṃ // HaDh_4.11 //

niyayaṃ bhavaṇam aigao puttaṃ pesemi tilla-diiyassa /

jāhe u na pāveī rukkhaṃ pāḍittu to geṇhe // HaDh_4.12 //

eyaṃ me aṇubhūyaṃ sayam eva imammi māṇuse loe /

jo na u pattiyai mahaṃ so deu mahāyaṇe bhattaṃ // HaDh_4.13 //

savva-kalā-patt'aṭṭhā bhaṇai Sasaṃ Khaṃḍavāṇaī dhuttī /

atth' esa āgamo me Bhāraha-Rāmāyaṇe ya suo // HaDh_4.14 //

Khaṃḍā Saseṇa bhaṇiyā Bhāraha-Rāmāyaṇe purāṇe vā /

eyārisāiṃ ya saheuyāiṃ bhaṇa kattha bhaṇiyāiṃ // HaDh_4.15 //

(Antyavipulā)

kaha tila-dumo mahallo tellāṇa ya kaha mahāṇaī vūḍhā /

kaha pīyā ya dasa-ghaḍā kaha khala-bhāro mae khaio // HaDh_4.16 //

Khaṃḍāĕ Saso bhaṇio saccaṃ taṃ loya-bāhiro taṃ si /

kiṃ kaiyāi suo te bālo vi jaṇo payaṃpaṃto // HaDh_4.17 //

jaha kira Pāḍaliputte nimmaviyā māsa-pāyavā bherī /

to kiṃ so tilarukkho mahappamāṇo na hŏjjāhi // HaDh_4.18 //

suvvai ya Bhārahammi vi gayāṇa puṇa ettha dāṇa-salileṇaṃ /

mahaī naī pavattā haya-gaya-raha-vāhiṇī ghorā // HaDh_4.19 //

uktañ ca

teṣāṃ kaṭataṭabhraṣṭair gajānāṃ madabindubhiḥ /

prāvartata nadī ghorā hastyaśvarathavāhinī // HaDh_4.20 //

(Anuṣṭubh)

jai gaya-maya-salileṇaṃ haya-gaya-raha-vāhiṇī naī viulā /

sariyā tayā pavattā to telloyā kaha na hoi // HaDh_4.21 //

rajjāŏ dhāḍieṇaṃ suvvai loyammi Bhīmaseṇeṇaṃ /

gaṃtūṇa Ikkacakkaṃ ghoro Baga-rakkhaso vahio // HaDh_4.22 //

bhattaṃ taṃḍula-kuṃbhaṃ mahisaṃ taha majja-ghaḍa-sahassaṃ ca /

jaṃ tassa bhatta-pāṇaṃ uvaṇīyaṃ teṇa taṃ bhuttaṃ // HaDh_4.23 //

jai Baga-rakkhasa-bhattaṃ bhuttaṃ Bhīmeṇa to kim egeṇaṃ /

bhāreṇa vi taṃ jimio bhāra-sayaṃ kiṃ na bhakkhesi // HaDh_4.24 //

suvvai ya Kuṃbhayaṇṇo sutta-viuddh'uṭṭhio niyaya-kālaṃ /

so piyai ghaḍa-sahassaṃ khāyai n'ege nara-sae ya // HaDh_4.25 //

jai piyai Kuṃbhayaṇṇo sutta-viuddh'uṭṭhio ghaḍa-sahassaṃ /

dasahiṃ ghaḍaehiṃ kiṃ Sasa kiṃ pannāsaṃ na pīyā te // HaDh_4.26 //

annaṃ ca imaṃ suvvai purāṇa-sui-ṇiggayaṃ imaṃ vayaṇaṃ /

asurāṇa jaha vah'atthā Agatthiṇā sāyaro pīo // HaDh_4.27 //

saggāo avaiṇṇā Gaṃgā Hara-jaḍa-viṇiggayā saṃtī /

Jaṇhu-risi-āsamapayaṃ majjheṇa uvāgayā navaraṃ // HaDh_4.28 //

pīyā ya teṇa risiṇā vāsa-sahassaṃ ca bhāmiyā uyare /

to Jaṇhueṇa mukkā kira bhaṇṇai Jaṇhavī teṇaṃ // HaDh_4.29 //

jai uyahiṃ Agatthī ṇaṃ pīyā Gaṃgā ya Jaṇhu-risiṇā ya /

to jai dasa tella-ghaḍā pīyā ya tae kim accheraṃ // HaDh_4.30 //

bhaṇai Saso so diio sumahaṃto kaha mae samukkhitto /

aha ukkhitto kaha puṇa nīo egāgiṇā gāmaṃ // HaDh_4.31 //

ucca-pphaliyaṃ dāuṃ hasiūṇaṃ Khaṃḍavāṇaī bhaṇai /

nūṇaṃ Sasa na kayāi vi suo tume Garula-vittaṃto // HaDh_4.32 //

Kāsava-risi-pattīo Kaḍḍū Viṇayā ahesi tīyammi /

dohiṃ vi tāhiṃ savattīhiṃ kiṃ pi kila paṇiyayaṃ chippaṃ // HaDh_4.33 //

(Antyavipulā)

jā paṇiyayammi jippai tīe dāsattaṇaṃ ca kāyavvaṃ /

jāvajjīvāe cciya ahavā dāyavvayaṃ amayaṃ // HaDh_4.34 //

Viṇayā jiya Kaḍḍūe karei dāsattaṇaṃ savattīe /

Kaḍḍū vi savattī-vehaeṇa Viṇayaṃ vimāṇei // HaDh_4.35 //

(Antyavipulā)

Viṇayā kira guru-bhārā dāsatte parama-dukkhiyā jāyā /

tatth' eva sā pasūyā tīse aṃḍa-ttayaṃ jāyaṃ // HaDh_4.36 //

dāsattaṇa-mokkh'aṭṭhā bhiṃdai tatth' egam aṃḍayaṃ Viṇayā /

tattha kila aṃḍayammī jāyā vicchū asaṃpuṇṇā // HaDh_4.37 //

dummaṇa-maṇā ya Viṇayā paritappai aṃḍayaṃ viṇaṭṭhaṃ me /

annaha ciṃtemi ahaṃ taṃ pi ya me annahā hoi // HaDh_4.38 //

muccejja parāhīṇattaṇassa ahaṃ nāma dāsa-ṇāmassa /

kaha vi durāsāĕ mae aṃḍaṃ bhinn'atthie bhinnaṃ // HaDh_4.39 //

(Ādivipulā)

addhii-laddhāe vilaviūṇa āsā-ṇibaddha-hiyayāe /

kaihi vi divasehiṃ tao puṇo vi biiy'aṃḍayaṃ bhinnaṃ // HaDh_4.40 //

(Ādivipulā)

biiy'aṃḍammi aṇūrū jāo kila so vi māyaraṃ bhaṇai /

ammo tumhehi imaṃ kim akāle aṃḍayaṃ bhinnaṃ // HaDh_4.41 //

jo te maṇoraho ciṃtio tti so pūrio mae hoṃto /

eṇhiṃ ayaṃgamo kiṃ karemi ahayaṃ parāhīṇo // HaDh_4.42 //

(Ādivipulā)

eyaṃ pi tāva taiyaṃ parirakkhasu aṃḍayaṃ payatteṇa /

jo ko vi ettha hohī so dukkha-vimukkhao tumhaṃ // HaDh_4.43 //

raha-sārahī aṇūrū ṭhavio Sūreṇa jo jage Aruṇo /

sayam eva ya Viṇayāe kameṇa tai'aṃḍayaṃ bhinnaṃ // HaDh_4.44 //

ahikula-bhaya-saṃjaṇaṇo jaṇavaya-vimhāvaṇo mahāghoro /

Viṇayā-maṇa-parioso jāo ya mahābalo Garuḍo // HaDh_4.45 //

bālatte ramamāṇo nāge Kaḍḍū-sue vihāḍei /

paidivasaṃ Kaḍḍūe Viṇayā khiṃsijjae evaṃ // HaDh_4.46 //

Viṇayāĕ dāsiyāe putteṇaṃ Garuḍaeṇa somālā /

māriya ahi-poyalayā caṃcū-calaṇa-ppahārehiṃ // HaDh_4.47 //

eyārisāiṃ Viṇayā soūṇam abhikkhaṇaṃ ca rovaṃtī /

pucchijjai Garuḍeṇaṃ roasi kiṃ kāraṇaṃ amme // HaDh_4.48 //

puttaya jīya-ṇimittaṃ pattā dāsattaṇaṃ savattīe /

rattiṃ divā ya duhiyā karemi āṇattiyaṃ tīse // HaDh_4.49 //

kaha muccejjasi amme amaeṇaṃ taṃ ca jāṇai piyā te /

kattha piyā Badarī-āsamammi Garuḍo gao tahiyaṃ // HaDh_4.50 //

(Antyavipulā)

Badar'āsamammi gaṃtuṃ Garuḍo pāesu nivaḍio piuṇo /

viyal'iṃdieṇa teṇa vi phāseṇ' uvalakkhio putto // HaDh_4.51 //

Garuḍeṇa jaṃpiyaṃ bhukkhio mi bhaṇiyaṃ ca Kāsaveṇ' evaṃ /

bārasa-joyaṇa-hatthī tattullo kacchao bīo // HaDh_4.52 //

(Ādivipulā)

amarisa-bhuyaṃga-vasao jujjhaṃti mahāsare mahākāyā /

rattiṃ divā ya donni vi sara-saṃkhobhaṃ karemāṇā // HaDh_4.53 //

bhakkhehi te tumaṃ gacchiūṇa mā putta bhukkhio accha /

gaṃtūṇa ekka-m-ekkeṇa teṇa te do vi paribhuttā // HaDh_4.54 //

(Mahāvipulā)

tatto ya paḍiṇiyatto pecchai vaḍapāyavaṃ mahāviḍayaṃ /

palaya-mahāmehaṃ pi va sa-sauṇa-kolāhalaṃ viulaṃ // HaDh_4.55 //

Caumuha-bīya-viṇiggayāṇa Vālakhillāṇa tassa heṭṭhammi /

uggaṃ tappaṃti tavaṃ risīṇam addh'uṭṭha-koḍīo // HaDh_4.56 //

(Ādivipulā)

so tattha samallīṇo bhaggo vaḍapāyavo kaḍakaḍaṃto /

mā hohī risi-vajjhā caṃcū vaḍapāyavaṃ guvilaṃ // HaDh_4.57 //

to sahasā ukkhiviuṃ chāemāṇo vva naha-yalaṃ savvaṃ /

Kinnara-maruya(?)-ṇarāmara-vimhayam aulaṃ jaṇemāṇo // HaDh_4.58 //

sāgara-jala-pakkhitte bahuviha-vaṇa-saṃḍa-maṃḍioddese /

dīvammi suvitthiṇṇe muṃcai vaḍapāyavaṃ Garuḍo // HaDh_4.59 //

vaḍaduma-laṃka-ṇimittaṃ Laṃkā-dīo tti to kayaṃ nāmaṃ /

Dasasīsass'āvāso āsi jahiṃ nisiyara-paissa // HaDh_4.60 //

Himavaṃte gaya-kacchava bhakkheuṃ so gao piu-sayāsaṃ /

bhaṇai ya tāya na dhāo bhakkhehi tao Nisāe tti // HaDh_4.61 //

bhakkheūṇa Nisāe amaya-pavattiṃ papucchiuṃ piyaraṃ /

amayaṃ putta kahemo voleuṃ naraya-Pāyāle // HaDh_4.62 //

dhagadhagadhagaṃta-huyavaha-pajjaliy'āveḍhiaṃ samaṃteṇaṃ /

rakkhijjai savva-surāsurehiṃ sayayaṃ amaya-kuṃḍaṃ // HaDh_4.63 //

(Antyavipulā)

ko puṇa tassa uvāo amay'atthī Kāsav'aṃgao ahayaṃ /

atthi uvāo jaha ghippai tti aidukkaro so u // HaDh_4.64 //

(Antyavipulā)

sappi-maho-dahi-salil'āieṇa saṃtappie 'ṇale dhaṇiyaṃ /

gahaṇaṃ hojja na hojja va gahie vi uvaddavāṇegā // HaDh_4.65 //

(Ādivipulā)

Kāsava-risi-vayaṇeṇaṃ gaṃtuṃ Garuḍeṇa do vi saṃpayayā /

paṃkhāṇi ya ghaya-mahu-pāṇieṇa saṃtappio Aggī // HaDh_4.66 //

(Antyavipulā)

titteṇa Huyavaheṇa ya amaya-sayāsaṃ pavesio Garuḍo /

gahiyaṃ ca neṇa amayaṃ devehiṃ vi kila samugghuṭṭhaṃ // HaDh_4.67 //

amayaṃ kuṃḍa-tthaṃ ciya vihageṇ' egeṇa nīyam ukkhiviuṃ /

soūṇam iṇaṃ vayaṇaṃ khuhiyaṃ sasurāsuraṃ bhuvaṇaṃ // HaDh_4.68 //

jo jatto cciya devo sahasāmayam avahaḍaṃ nisāmei /

so ahara-phuraṃt'oṭṭho tatto cciya maggio laggo // HaDh_4.69 //

muggara-musaṃḍhi-paṭṭisa-gaya-kaṇaga-pparasu-bhiṃḍimālehiṃ /

hala-musala-lauḍa-valayā-sūl'āuha-paharaṇa-samaggo // HaDh_4.70 //

kalayala-ravo surāṇaṃ pūrei nah'aṃgaṇaṃ niravasesaṃ /

haṇa chiṃda bhiṃda giṇhaha mā muyaha rasāyala-gayaṃ pi // HaDh_4.71 //

olaggio ya Garuḍo samaṃtao deva-saya-sahassehiṃ /

pariveḍhio ya bhaṇio amay'āhārī hao si tti // HaDh_4.72 //

ekkatto cciya bhuvaṇaṃ ekatto Kāsav'aṃgao pakkhī /

kāyara-maṇa-kaṃpaṇayaṃ tehiṃ ya samaraṃ samāraddhaṃ // HaDh_4.73 //

suragaṇa-sayaṃ sahassaṃ lakkhaṃ koḍiṃ pi causu vi disāsu /

pesei Jama-sayāsaṃ Garuḍo pakkha-ppahārehiṃ // HaDh_4.74 //

Viṇaya-suyassa surāṇa ya gayaṇayale vaṭṭae mahāghoraṃ /

jujjhaṃ amayassa kae vimhāvaṇayaṃ tihuyaṇassa // HaDh_4.75 //

to so deva-samūho Garuḍeṇ' ekkeṇa raṇa-muh'āvaḍio /

haya-vihaya-dīṇa-vayaṇo khaṇeṇa bhaggo nirāṇaṃdo // HaDh_4.76 //

deve ya parāhutte daṭṭhuṃ palay'aggi-jāla-sama-sarisaṃ /

to kulisaṃ Sahasapaloyaṇeṇa Garuḍovariṃ mukkaṃ // HaDh_4.77 //

(Antyavipulā)

kulisaṃ Garuḍa-sarīre paccupphuḍiyaṃ silāyale c'eva /

Iṃdo bhaṇai Aṇaṃtaṃ sahoyaraṃ Garuḍa-bhaya-bhīo // HaDh_4.78 //

to taha vajjābhihayaṃ sa-surāsura-samara-paccaya-ṇimittaṃ /

Garuḍeṇa caṃcuāe sayam ev' uppāḍiyaṃ picchaṃ // HaDh_4.79 //

Viṇhū viya pajjalio bārasa-ravi-teya-sappabhaṃ cakkaṃ /

ghettuṃ Garuḍa-vah'atthā aṇudhāvai maggao kuvio // HaDh_4.80 //

bhī-uvvigga-sasaṃbhamaṃ hā hā kim iyaṃ ti gaggir'ullāvā /

risi-gaha-Saṇicchar'āī gaṃtum Aṇaṃtaṃ payaṃpaṃti // HaDh_4.81 //

bho bho savvagao viya pabhū ya sasurāsurassa loyassa /

taha vi tumaṃ nīo iva sayaṇass' uvariṃ nirāvikkho // HaDh_4.82 //

Garuḍo ya sahayaro te paḍisāhara vaṇa-davovamaṃ kovaṃ /

mā mūḍho meccho iva paharasu niyaesu gattesu // HaDh_4.83 //

risi-gaha-vayaṇaṃ souṃ imaṃ tu cakk'āuho vi ciṃtei /

koh'āieṇa pecchasu mae sahāo hao hoṃto // HaDh_4.84 //

nāṇī satth'attha-viyāṇao vi koh'aggi-jāla-saṃtatto /

gammāgamma-hiyāhiya-kajjākajjaṃ na lakkhei // HaDh_4.85 //

(Ādivipulā)

Garuḍassa Aṇaṃtassa ya jāyā saṃdhī jhao kao Garuḍo /

amayaṃ dāuṃ Viṇayaṃ moyai dāsattaṇāo tti // HaDh_4.86 //

jai gaya-kacchabha-vaḍaduma Garuḍeṇ' uppāḍiyā ya nīyā ya /

to ukkhivasi Sasa tayaṃ tumaṃ pi daiyaṃ subaddhaṃ pi // HaDh_4.87 //

sattāha-vaddalammī dhario Govaddhaṇo Mahumaheṇaṃ /

tā kaha na dharesi tumaṃ gaya-dīyaṃ tella-paripuṇṇaṃ // HaDh_4.88 //

seū-baṃdhe viya vāṇarehiṃ negāiṃ joyaṇāiṃ girī /

ukkhiṇiuṃ uvviddhā pakkhittā uyahi-majjhammi // HaDh_4.89 //

(Ādivipulā)

to jai putteṇa tuhaṃ rukkho ummūlio mahāviḍavo /

dīyam apāveṃteṇaṃ to bhaṇasu tahiṃ kim accheraṃ // HaDh_4.90 //

vaṇavāḍiya-bhaṃge vi ya Haṇuyaṃto mahiruhe mahāviḍave /

ukkhaṇai ayatteṇaṃ jattha imo Khaṃdhao bhaṇio // HaDh_4.91 //

khajjūrī māruiṇo akammahayā palāsavaggaṃteṇaṃ /

sīseṇa uttaraṃtī akammahayā palāsavaggaṃte // HaDh_4.92 //

jai te mahaṃtarukkhā tirikkhajoṇī-gaeṇa Haṇueṇa /

ummūliyā samūlā tuha putto kiṃ na ukkhaṇai // HaDh_4.93 //

aisaio bhaṇai Saso Khaṃḍāvāṇīĕ tattha dhuttīe /

Khaṃḍaṃ bhaṇai iyāṇiṃ kahehi jaṃ taṃ samaṇubhūyaṃ // HaDh_4.94 //

____________________________________________________

aha bhaṇai Khaṃḍavāṇā vihasaṃtī Atthasattha-ṇimmāyā /

buddhīĕ ahiya-buddhī dhutte tulleuṃ vayaṇam iṇaṃ // HaDh_5.1 //

olaggiya tti amhehiṃ bhaṇaha jai aṃjaliṃ kariya sīse /

uvasappaha jai ya samaṃ to bhattaṃ demi savvesiṃ // HaDh_5. 2 //

(Ādivipulā)

to te bhaṇaṃti dhuttā amhaṃ savvaṃ jagaṃ tulemāṇā /

kaha eva dīṇa-vayaṇaṃ tujjha sayāse bhaṇīhāmo // HaDh_5.3 //

ahavā

avi uḍḍhaṃ ciya phuṭṭaṃti māṇiṇo na vi sahaṃti avamāṇaṃ /

atthamaṇammi vi raviṇo kiraṇā uḍḍhaṃ ciya phuraṃti // HaDh_5.4 //

(Ādivipulā)

pavaṇo cciya āhāro vaṃkaṃ caṃkammiyaṃ aparibhūyaṃ /

savva-jag'uvveya-karaṃ aho sujīyaṃ bhuyaṃgāṇaṃ // HaDh_5.5 //

īsi hasiūṇa to sā Khaṃḍāvāṇā bhaṇei bho suṇaha /

akkhāṇayaṃ aṇaliyaṃ jaṃ aṇubhūyaṃ mae c'eva // HaDh_5.6 //

āsi ahaṃ taruṇatte jovvaṇa-lāyaṇṇa-vaṇṇa-guṇa-kaliyā /

rūveṇa aṇanna-samā jaṇa-maṇa-ṇayaṇ'ūsava-bbhūyā // HaDh_5.7 //

navari ya kayāi ahayaṃ uṇhāyā maṃḍave suha-pasuttā /

uvabhuttā Pavaṇeṇaṃ rūva-guṇ'ummatta-hiyaeṇaṃ // HaDh_5.8 //

jāo teṇa suo me tāhe ciya jāya-mettao to so /

āucchiūṇa ya mamaṃ katto vi gao aha khaṇeṇaṃ // HaDh_5.9 //

to bhaṇaha kiṃ na saccaṃ jai vāeṇaṃ havejja putto tti /

to n'atthi kā vi raṃḍā aputtiyā jīva-loyammi // HaDh_5.10 //

taṃ bhaṇai Mūladevo suvvai loya-ssuīsu Pavaṇeṇaṃ /

Kuṃtīĕ Bhīmaseṇo jāo Nīlāĕ Haṇuyaṃto // HaDh_5.11 //

Pārāsareṇa Vāso macchiṇi-jaṇio pasūyao c'eva /

kajje sarejjasu tti ya jaṇaṇiṃ bhaṇiūṇa avakaṃto // HaDh_5.12 //

jāyā akkhaya-joṇī Joyaṇagaṃdhā ya risi-pabhāveṇaṃ /

Saṃtaṇuṇā tīĕ suo Vicittavirio tti saṃjaṇio // HaDh_5.13 //

asue mayammi tammī Joyaṇagaṃdhāĕ sumario Vāso /

saṃpatto ya khaṇeṇaṃ jaṇaṇi-sayāse risi-varo so // HaDh_5.14 //

bhaṇio aha māūe putta aputtā na vaḍḍhae vaṃso /

tā taha karehi vacchaya jaha hoi kulassa saṃtāṇo // HaDh_5.15 //

teṇ' uddhario vaṃso Paṃḍu-ṇar'iṃdo jayammi vikkhāo /

Dhayaraṭṭho ya nara-vaī Viduro ya mahāmaī jaṇio // HaDh_5.16 //

bhāu-jjāyā tiṇṇi vi bhuttūṇaṃ dei tiṇha vī sāvaṃ /

akayaṃ tu ohayāso Vāso risi-dhamma-pabbhaṭṭho // HaDh_5.17 //

bhavati cātra ślokaḥ

āhāre caiva yonau ca bījakarmaṇi yaḥ śuciḥ /

tasya kṛcchrāgatasyāpi na pāpe ramate matiḥ // HaDh_5.18 //

(Anuṣṭubh)

jai saccaṃ Pavaṇa-suo Bhīma-Haṇū navara paṭṭhio Vāso /

uyara-viṇiggaya-matto to saccaṃ tujjha vī vayaṇaṃ // HaDh_5.19 //

puṇar avi Khaṃḍāvāṇā bhaṇai sahī āsi majjh' Umā devī /

tīe maṃto dinno sasurāsura-loya-āgariso // HaDh_5.20 //

āgarisio Ravī me joisa-cakkāhio ahiya-teo /

teṇa vi me bala-jutto jāo putto mahāsatto // HaDh_5.21 //

chāsīi-sahassāiṃ dahai Ravī meiṇiṃ samaṃteṇaṃ /

kaha teṇa na daḍḍhā haṃ raikajja-samāgayā saṃtī // HaDh_5.22 //

aha bhaṇai Kaṃḍarīo Kuṃtī jai hoṃta daḍḍha Sūreṇaṃ /

to ḍajjhaṃtā si tumaṃ saccaṃ taṃ n'atthi saṃdeho // HaDh_5.23 //

Khaṃḍā bhaṇai puṇo me Jalaṇo āgarisio sura-varāṇaṃ /

jo vayaṇaṃ teṇa vi me putto jāo jui-mahaṃto // HaDh_5.24 //

dūrattho ḍahai Ravī Aggī aṃgehiṃ pharisio ḍahai /

kaha teṇa na daḍḍhā haṃ Jalaṇeṇa samāgayā saṃtī // HaDh_5.25 //

bhaṇai ya Elāsāḍho Jama-pattī Huyavaheṇa kira bhuttā /

Aggī-huṇaṇa-ṇimittaṃ Jalaṇa-gihaṃ aigayā saṃtī // HaDh_5.26 //

asamatta-suraya-kajjo Jalaṇo jā aigao Jamo tāhe /

acayaṃto osariuṃ Jalaṇo tīe vi oilio // HaDh_5.27 //

taṃ siḍhiliya-mehaliyaṃ asamāṇiya-suraya-kīliyaṃ bālaṃ /

oiliūṇa Jamo vi ya dev'atthāṇiṃ aha paviṭṭho // HaDh_5.28 //

devehiṃ ya so bhaṇio apatta-raiyassa sāgayaṃ tujjha /

niggilai tao deviṃ tīĕ muhāo ya Jalaṇo vi // HaDh_5.29 //

dhāvaṃto ucchinno Jameṇa to aigao vaṇaṃ gahaṇaṃ /

kahio gaehiṃ to so tesiṃ vāyā hiyā teṇaṃ // HaDh_5.30 //

jai saccaṃ Jama-pattī bhuttā Jalaṇeṇa n'eya sā daḍḍhā /

to kaha ḍajjhihisi tumaṃ Jalaṇeṇa samāgayā saṃtī // HaDh_5.31 //

Khaṃḍā bhaṇai puṇo me Erāvaṇa-vāhaṇo Sahass'accho /

āgarisio mi so vī teṇa vi jāo mahaṃ putto // HaDh_5.32 //

accharasāo mottuṃ kaha Iṃdo sevae maṇussīo /

bhaṇai Saso kiṃ na suyā Goyama-pattī Ahilla tti // HaDh_5.33 //

Iṃdeṇaṃ paribhuttā ruṭṭheṇaṃ Goyameṇa Iṃdassa /

kāūṇa bhaya-sahassaṃ caṭṭāṇa samappio tāhe // HaDh_5.34 //

daḍha-kaḍhiṇa-sarīrāṇaṃ mayaṇāṇala-jāla-saṃpalittāṇaṃ /

baḍuyāṇa sagāsāo Sakko viddhaṃsaṇaṃ patto // HaDh_5.35 //

devehiṃ Goyamāo kaha vi payatteṇa moio Iṃdo /

jaṃ tassa bhaga-sahassaṃ acchi-sahassaṃ tayaṃ jāyaṃ // HaDh_5.36 //

Kuṃtīe Iṃdeṇa vi putto Pattho tti loya-vikkhāo /

jāo evaṃ jai suo tujjha vi Iṃdeṇa ko doso // HaDh_5.37 //

aha bhaṇai Khaṃḍavāṇā tubbhe jāṇaha kulaṃ ca gottaṃ ca /

majjhaṃ māyā-vittaṃ bhaṇiyā to Mūladeveṇaṃ // HaDh_5.38 //

Pāḍaliputte nayare taṃ si suyā Nāgasamma-vippassa /

Somasirīe dhūyā Goyama-gottammi vikkhāyā // HaDh_5.39 //

sā bhaṇai n'avi ahaṃ sā tumhe sārikkha-vimhiyā majjhaṃ /

sippiya-dhūyā ahayaṃ rāula-rayayassa vikkhāyā // HaDh_5.40 //

bahu-dhaṇa-dhanna-samiddhaṃ amha gharaṃ rāya-riddhi-sama-sarisaṃ/

nāmeṇa Daḍḍhiyā haṃ nīyā goehiṃ kammehiṃ // HaDh_5.41 //

daṃḍabhaḍa-bhoiyāṇaṃ ranno aṃteurassa savvassa /

sippiya-sahassam ahiyaṃ jaṃ dhovai majjha vatthāiṃ // HaDh_5.42 //

vatthāṇa mahāsayaḍaṃ bharittu aha bahuviha-ppagārāṇaṃ /

purisa-sahasseṇa samaṃ patt'āsi naiṃ salila-puṇṇaṃ // HaDh_5.43 //

chaḍachaḍachaḍassa tahiyaṃ huṃ huṃ siṃṭā-ravaṃ kareṃtehiṃ /

annunnam aisayaṃtehiṃ tehiṃ kuṃd'iṃdu-dhavalāiṃ // HaDh_5.44 //

dhoyāiṃ vatthāiṃ majjhaṃ purisehiṃ cukkha-bhūyāiṃ /

to āyava-dittāiṃ uvvāiyāiṃ muhutteṇaṃ // HaDh_5.45 //

āyo ya mahāvāo samaṃtao pāyave ya bhaṃjaṃto /

to teṇaṃ pavaṇeṇaṃ vatthāiṃ hiyāiṃ savvāiṃ // HaDh_5.46 //

gacchaha tubbhe cuiyā rayaṃ ti kammāriyā mae bhaṇiyā /

jo doso avarāho va ko vi so hohiī majjhaṃ // HaDh_5.47 //

(Mahāvipulā)

rāula-bhaeṇa to haṃ gohā-rūvaṃ karettu rayaṇīe /

āyā nayar'ujjāṇaṃ sasalila-ghaṇa-sannihaṃ rammaṃ // HaDh_5.48 //

viule nayar'ujjāṇe samaṃtao hiṃḍiyā suvīsatthā /

aha pacchimammi jāme bhaya-ciṃtā me samuppannā // HaDh_5.49 //

gohaṃ camma-ṇimittaṃ maṃsa-ṇimittaṃ ca jaṇavao haṇai /

to ko hojja uvāo jaha maraṇa-bhayaṃ na hojjāmi // HaDh_5.50 //

kiṃ hojja kayaṃ su-kayaṃ kattha gayā nivvuī lahejjaṃ ti /

paribhamami samaṃteṇaṃ bhaya-pavaṇa-samāhayā tahiyaṃ // HaDh_5.51 //

bahuyāiṃ viciṃteuṃ gohā-rūvaṃ tayaṃ payahiūṇaṃ /

rattāsoya-sayāse cūya-layā haṃ parāvattā // HaDh_5.52 //

dussīlā iva juvaī timira-paḍaṃ guṃṭhiyā gayā rayaṇī /

kamal'āgara-tuṭṭhiyaro sahasā ya samuṭṭhio sūro // HaDh_5.53 //

dinno ya amha abhao rannā paureṇa cāu-vaṇṇeṇa /

jaha ubbhiṃḍaṃtu tahiṃ rāula-rayagāiṃ savvāiṃ // HaDh_5.54 //

to so paḍahaga-saddo nava-pāusa-ghaṇa-ravaṃ visesaṃto /

āpūrei samaṃtaŏ s'abbhaṃtara-bāhiraṃ nayaraṃ // HaDh_5.55 //

souṃ paḍahaga-saddaṃ to taṃ mottūṇa cūya-laya-bhāvaṃ /

lāvanna-guṇ'āiṇṇā puṇar avi itthī samuppannā // HaDh_5.56 //

tassa ya sagaḍassa tahiṃ nāḍa-varattā ya tajjaṇīo ya /

rayaṇīĕ kolhuehiṃ sāṇehiṃ bhakkhiyā savve // HaDh_5.57 //

aha navari majjha piuṇā nāḍa-varattā ya maggamāṇeṇaṃ /

laddhā mūsaya-cheppā nāḍa-varattā tahiṃ valiyā // HaDh_5.58 //

to kiṃ etthaṃ saccaṃ bhaṇai Saso Baṃbha-Kesavā aṃtaṃ /

na gayā jai liṃgassa u to kaha vayaṇaṃ tuha asaccaṃ // HaDh_5.59 //

Rāmāyaṇe ya suvvai jaha Haṇuyaṃtassa āsi laṃgūlaṃ /

mahaī-mahappamāṇaṃ vattha-sahassehiṃ negehiṃ // HaDh_5.60 //

veḍhittu rakkhasehiṃ sittaṃ tellassa ghaḍa-sahassehiṃ /

Laṃkā-purī-vah'atthā palīviyaṃ maṃda-puṇṇehiṃ // HaDh_5.61 //

sā devaloya-sarisā Laṃkā-puri savvaloya-vikkhāyā /

ālīviyā samaṃtā Haṇueṇaṃ Vāu-putteṇaṃ // HaDh_5.62 //

jai saccaṃ laṃgūlaṃ sumahaṃtaṃ āsi Vāu-puttassa /

to te mūsiya-cheppā kinna havai iddahā rajjū // HaDh_5.63 //

annaṃ ca imaṃ suvvai porāṇa-suīsu niggayaṃ vayaṇaṃ /

jaha kira Gaṃdhāri-varo raṇṇe Kuruvattaṇaṃ patto // HaDh_5.64 //

rāyā āsī kira so mahābala-parakkamo ahiya-teo /

Sakko devāhivaī parajjio jeṇa samarammi // HaDh_5.65 //

so taṃ ahikkhivaṃto suraguru-satto araṇṇa-majjhammi /

jāo mahā-ayagaro rajja-pabbhaṭṭhā ya Paṃḍu-suyā // HaDh_5.66 //

tammi araṇṇammi ṭhiyā egāgī niggao navari Bhīmo /

teṇ' ayagareṇa khaddho uvaladdha-suī ya Dhamma-suo // HaDh_5.67 //

patto ayagara-mūlaṃ sattaya-pucchāo kahayai tassa /

uggilai ayagaro so Bhīmaṃ sāvassa-y-aṃtammi // HaDh_5.68 //

jāo puṇar avi rāyā jai saccaṃ to tumaṃ pi sabbhūyaṃ /

gohā cūya-layā vi ya gaṃtūṇa puṇaṇṇavā jāyā // HaDh_5.69 //

to bhaṇai Khaṃḍavāṇā dhutte evaṃ gae vi kajjammi /

majjhaṃ kuṇaha paṇāmaṃ jāhe bhattaṃ payacchāmi // HaDh_5.70 //

jai kaha vi parājijjaha savve vi ya samuiyā mae tubbhe /

to tumha n'atthi loe kāṇā vi kavaḍḍiyā mullaṃ // HaDh_5.71 //

to te bhaṇaṃti dhuttā ko satto nijjiṇittu amhehiṃ /

māyā-ṇiyaḍi-pahāṇo Harī vi sakkaṃ jai havejjā // HaDh_5.72 //

to sā avagaya-tosā te dhutte Khaṃḍavāṇaī bhaṇai /

pecchaha ettāhiṃ ciya savve vi karemi haya-vayaṇe // HaDh_5.73 //

tesiṃ vatthāṇa kae rāyāṇaṃ pucchiuṃ pari-y-aḍāmi /

gām'āgara-pura-paṭṭaṇa-jaṇavaya-parimaṃḍiyaṃ vasuhaṃ // HaDh_5.74 //

annaṃ ca mamaṃ cauro ceḍa-ruyā jāyayā cira-paṇaṭṭhā /

tesiṃ ca kaeṇa ahaṃ parihiṃḍaṃtī ihaṃ pattā // HaDh_5.75 //

te ceḍā tubbhe hi ya tāṇi ya vatthāṇi te parihiyāṇi /

jai vi na pattiyah' eyaṃ to deha mahāyaṇe bhattaṃ // HaDh_5.76 //

to te lajjiya-viliyā bhaṇaṃti aisaṃdhiyā tume amhaṃ /

meḍhī-bhūyā eṇhiṃ buddhi-payāreṇa jāyā si // HaDh_5.77 //

eyassa bharassa tumaṃ ekkā joggā jayammi vikkhāyā /

sattāha-vaddalammī de bhattaṃ savva-dhuttāṇaṃ // HaDh_5.78 //

sā bhaṇai vihasamāṇā puvviṃ vinnaviyayā mae tubbhe /

bho gavvam uvvahaṃtā ohasaha jaṇaṃ abuddhīyā // HaDh_5.79 //

to te bhaṇaṃti suṃdari cāyo ghaṭṭo kao havai jāhe /

tāhe sattai-jāī esā purisassa payaīo // HaDh_5.80 //

uppattiya-buddhīe amhe abhisaṃdhiyā tume suyaṇu /

to savve vi bhaṇāmo amhaṃ bhattaṃ payacchāhi // HaDh_5.81 //

bāḍhaṃ ti bhāṇiūṇaṃ peyavaṇaṃ sā gayā subīhaṇayaṃ /

siva-ḍāyaṇi-peya-pisāya-bhūya-sadd'āulaṃ viulaṃ // HaDh_5.82 //

(Antyavipulā)

tūlī-gaṃḍuvahāṇaya-paḍisira-caṃdovayāṇa ṭhāṇe ya /

citta-paḍa-paṭṭa-sāḍaya-koyaṃvaya-kāya-ḍajjhaṃtaṃ // HaDh_5.83 //

taru-kusuma-kesar'uppāsa-vāsa-tala-catt'-alattaya-vicittaṃ /

luliy'addha-iṃda-pauraṃ pavviddha-kalevaraṃ ghoraṃ // HaDh_5.84 //

rūviṇiyāṇa thaṃbhiya-macchiya-saṃghāya-bhiṇibhiṇāyaṃtaṃ /

maḍaya-ciy'aṃtovari-ḍajjhamāṇa-silisilisilāyaṃtaṃ // HaDh_5.85 //

(Antyavipulā)

vijjā-sāhaṇa-rabhas'uṭṭhiyaṃta-ṇaccaṃta-maḍaya-veyālaṃ /

bhīm'aṭṭahāsa-huṃkāra-tāla-saddāla-gaṃbhiraṃ // HaDh_5.86 //

(Mahāvipulā)

vasa-ruhira-kkaya-kaddama-samaṃtao bhīma-kimi-kul'āiṇṇaṃ /

āmisa-kajja-samujjaya-ṇiṭṭhaya-bahuvihaga-jujjhaṃtaṃ // HaDh_5.87 //

ruhir'uggāla-bhalabhalaṃ sahassa-sūlā-vibhinna-mucchaṃtaṃ /

vitiriccha-bhamaṃta-siyāla-kola-ṇivaḍaṃta-ghuṭṭaṃtaṃ // HaDh_5.88 //

(Antyavipulā)

aiduggaṃdhiya-vāyaṃta-māruyaṃ sava-savaṃta-ṇīsaddaṃ /

bībhacch'uvvevaṇayaṃ bhaya-saṃjaṇayaṃ surāṇaṃ pi // HaDh_5.89 //

(Ādivipulā)

evaṃ vihe masāṇe pecchai aviṇaṭṭhayaṃ vigaya-jīvaṃ /

acira-vimukkaṃ bālaṃ Khaṃḍā taṃ geṇhiuṃ ṇhavai // HaDh_5.90 //

abbhaṃgeūṇa tayaṃ jara-cīvara-susaṃgayaṃ kareūṇaṃ /

Ujjeṇīĕ paviṭṭhā seṭṭhissa gharaṃ dhaṇa-samiddhaṃ // HaDh_5.91 //

diṭṭho ya ṇāĕ seṭṭhī āsaṇa-viṭṭho jaṇeṇa parikiṇṇo /

bhaṇio ya nāĕ bhāo suttiya-dhūyā mi duggaiyā // HaDh_5.92 //

kaivaya-divasa-pasūyā abaṃdhavā asaraṇā videsa-tthā /

tubbhe mahappabhāvā pii-hara-mullaṃ mamaṃ deha // HaDh_5.93 //

seṭṭhī vāula-citto puṇo puṇo tīĕ uccaraṃtīe /

rusio bhaṇei purise sigghaṃ nīṇeha damiaṃ tti // HaDh_5.94 //

niggacchasu tti bhaṇiyā aha jaṃpai mā chiv' assa bālassa /

annaṃ ṭhāṇaṃ bappi-kkayaṃ ti to me ma pelleha // HaDh_5.95 //

(Antyavipulā)

niggaccheuṃ n'icchai tehiṃ ya purisehiṃ pelliyā sahasā /

dharaṇīyale nivaḍiā bhaṇai mahaṃ mārio putto // HaDh_5.96 //

hā majjha aṇāhāe nāho hohi tti ciṃtayaṃtīe /

so vi maṇoraha-taṃtū chinno nicchitta-gattehiṃ // HaDh_5.97 //

bho pecchaha jaṇa samudaya imeṇa dhaṇa-gavvieṇa vaṇieṇa /

aṭṭhārasa-dosa-vivajjiyāĕ mārāvio putto // HaDh_5.98 //

(Antyavipulā)

aha paharium āraddhā sīse ya ure ya sā asāhāraṃ /

bhaṇai ya seṭṭhī majjhaṃ bhaggaṃ bhikkhā-kavālaṃ tti // HaDh_5.99 //

to sĕṭṭhī ādanno savva-payatteṇa pariyaṇa-samaggo /

aṇuṇei vilavamāṇiṃ kareha mā suyaṇu bolaṃ ti // HaDh_5.100 //

dinnā ya kaṇṇiyā se bhaṇiyā ghettūṇa vaccasū puttaṃ /

mā ruyasu mā ya kaṃdasu tuha ettiya jīvaṇaṃ dinnaṃ // HaDh_5.101 //

ghettūṇa kaṇṇiyaṃ mayaṃ kalevaraṃ ca sā tao aikkaṃtā /

seṭṭhissa nirābāhaṃ jāyaṃ dāṇa-ppabhāveṇaṃ // HaDh_5.102 //

api ca

tyāgena bhūtāni vaśībhavanti tyāgena vairāṇy api yānti nāśam /

paro 'pi bandhutvam upaiti dānāt tyāgo hi sarvavyasanāni hanti // HaDh_5.103 //

(Upajāti)

sisu-maḍayaṃ chaḍḍeuṃ Khaṃḍā viul'attha-lāha-parisuddhā /

maṇi-kaṇaya-rayaṇa-mottiya-camara-samiddhaṃ gayā haṭṭaṃ // HaDh_5.104 //

kāūṇa ya viṇioyaṃ tesiṃ dhuttāṇa sīya-vihurāṇaṃ /

bahu-khajja-pejja-kaliyaṃ susakkayaṃ bhoyaṇaṃ dei // HaDh_5.105 //

bhuttāyaṃtehiṃ tao savvehiṃ vi haṭṭha-tuṭṭha-maṇasehiṃ /

bhaṇiyā ya Khaṃḍavāṇā sujīviyaṃ jīviyaṃ tujjha // HaDh_5.106 //

jaṃ te buddhi-balāo dhutta-jaṇo nijjiṇittu sayarāhaṃ /

saṃtappio khuh'atto viuleṇaṃ bhatta-pāṇeṇaṃ // HaDh_5.107 //

sussikkhiyā vi purisā tāiṃ na jāṇaṃti jaṃpiyavvāiṃ /

jāiṃ asikkhiāo katto vi lahaṃti mahilāo // HaDh_5.108 //

paḍhiūṇa ya satthāiṃ purisā nāūṇa tesim atthāiṃ /

na samatthā paḍivayaṇe uppanna-maī jahā mahilā // HaDh_5.109 //

api ca

adhītya śāstrāṇi vimṛśya cārthān na tāni vaktuṃ puruṣāḥ samarthāḥ /

yāni striyaḥ pratyabhidhānakāle vadanti līlāracitākṣarāṇi // HaDh_5.110 //

(Upajāti)

Caṃd'Iṃda-Vāu-Sūrā Aggī Dhammo ya loya-vikkhāyā /

loeṇa dūmiyā te vammaha-rai-rāga-dosehiṃ // HaDh_5.111 //

suvvai ya āgamammī jaha Kaṇho savva-bīya-majjha-gao /

suhumesu bāyaresu ya tila-tusa-mettesu davvesu // HaDh_5.112 //

jai savvagao Kaṇho ciṃtijjai jattha tattha so c'eva /

ciṃteṃtao vi so cciya tamhā so kiṃ viciṃtei // HaDh_5.113 //

annaṃ pi aliya-vayaṇaṃ suvvai loyammi niggayaṃ iṇamo /

jaha Pavaṇa-Gaṇāhivaī Selasuyāvayava-uppanno // HaDh_5.114 //

Baṃbhāṇa-samuppattī Tilottamā-Uvvasī ya Doṇassa /

uppatti Chammuhassa ya Narakubbara āsi tāṇaṃ ca // HaDh_5.115 //

Kaṇhassa ya niggamaṇaṃ jaha kovā Seyakuṃḍalī jāo /

jaha sirakavāla-majjhe ruhirammi Naro samuppanno // HaDh_5.116 //

jai Jāyavassa māyā-uppattī Halaharassa logammi /

jaha jāyā Selasuyā vikkhāyā jīva-loyammi // HaDh_5.117 //

jai hoṃti pavvayāṇaṃ puttā dhūyā kuḍuṃba-dhammo vā /

to taṃ imammi loe Jaṃbūdīve na māejjā // HaDh_5.118 //

eyāiṃ capphalāiṃ Bhāraha-Rāmāyaṇe nibaddhāiṃ /

saṃcālaṇam asahaṃtā jaha jutti-kayaṃ suvaṇṇa vva // HaDh_5.119 //

eyaṃ loiya-satthaṃ gaddaha-liṃḍa vva bāhire maṭṭhaṃ /

jāv' aṃtaṃ joijjai tusa-bhusa-busa-mīsiyaṃ savvaṃ // HaDh_5.120 //

to te bhaṇāmi savve kusamaya-kussui-paheṇa muttūṇa /

savvanna-desiyammi ya laggaha magge payatteṇaṃ // HaDh_5.121 //

eyaṃ Dhuttakkhāṇaṃ soūṇaṃ loiyassa param'atthaṃ /

taha kuṇaha nicchiya-maiṃ jaha darisaṇa-suddhi hoi parā // HaDh_5.122 //

Cittauḍa-dugga-siri-saṃṭhiehiṃ sammatta-rāya-rattehiṃ /

sucariya-samūha-sahiyā kahiyā esā kahā suvarā // HaDh_5.123 //

sammatta-suddhi-heuṃ cariyaṃ Haribhadda-sūriṇā raiyaṃ /

nisuṇaṃta-kahaṃtāṇaṃ bhava-virahaṃ kuṇau bhavvāṇaṃ // HaDh_5.124 //

Seyaṃbara-vara-sūrī Haribhaddo kuṇau amha bhaddāiṃ /

jassa sasi-saṃkha-dhavale Jiṇ'āgame erisā bhattī // HaDh_5.125 //