[356] En Leederkranz

1. Dat Hus

Verstęken mank Eschen dar steit en lütt Hus,
Da's Abends so sachen, dar röhrt sik keen Mus,
Dar schint ut de Blœder en Licht rein so blank,
En Olsche in Lœhnstohl, un Se op de Bank.
Dat schint mi in Ogen, dat treckt mi in Sinn,
Dat treckt mi in Schummern so heemli derhin,
So warm un so luri, weet sülm ni wosück –
Ik sta ünnert Finster un frei mi un kik.
Un sitt wi to snacken umt Licht oppe Bank,
So schint mi ęr Backen noch eenmal so blank,
Denn is dat so ruhi, denn röhrt sik keen Mus:
O, kunn ik der bliben, un muss ni to Hus!

[357] 2. De Garn

Lęben – och! – wa ist ni schön!
Dod is wul so swar!
Un de Karkhof is so neeg,
Dicht an unsen Garn.
[358]
Seeg ik na de Krüz un Steen,
Seeg ik na de Maan,
Hör ik sach de Karkenklock
Still un truri gan.
Och! un dochen rükt de Blom,
Un min Hart dat sleit!
Süh! un ünnern Appelbom,
Süh, mal, wull dar steit!
Kumm, dat Lęben is so schön!
Dod is wul en Drom.
Lat uns œwern Karkhof sehn
Mank de Büsch un Blom'.

[359] 3. De ol Wichel

Denn klopp man ant Finster,
Denn klopp du man sacht,
Dat Dörp liggt to slapen
Un still is de Nacht.
Denn klopp man ant Finster,
Man sacht anne Rut,
Ik hör di int Slapen,
So kam ik herut.
[360]
De Garn is so ruhi,
De Maan is so blank,
Kumm sacht, kumm vunnacht,
Kumm de Stig man hentlank!
Dar steit de ol Wichel,
Darünner de Steen,
Un beid wüllt wi sitten,
Nan Hęben rop sehn.
Un beid wüllt wi snacken
So heemli, so sacht,
Un nümms schall dat węten,
As Maan un de Nacht.

[361] 4. Voer Doer

Lat mi gan, min Moder slöppt!
Lat mi gan, de Wächter röppt!
Hör! wa schallt dat still un schön!
Ga! un lat mi smuck alleen!
[362]
Süh! dar liggt de Kark so grot!
An de Mür dar slöppt de Dod.
Slap du sund un denk an mi!
Ik dröm de ganze Nacht vun di.
Moder lurt! se hört't gewis!
Nu's genog! – adüs! adüs!
Morgen Abend, wenn se slöppt,
Bliv ik, bet de Wächter röppt.
License
Der annotierte Datenbestand der Digitalen Bibliothek inklusive Metadaten sowie davon einzeln zugängliche Teile sind eine Abwandlung des Datenbestandes von www.editura.de durch TextGrid und werden unter der Lizenz Creative Commons Namensnennung 3.0 Deutschland Lizenz (by-Nennung TextGrid) veröffentlicht. Die Lizenz bezieht sich nicht auf die der Annotation zu Grunde liegenden allgemeinfreien Texte (Siehe auch Punkt 2 der Lizenzbestimmungen).
Link to license
Citation Suggestion for this Edition
TextGrid Repository (2012). Groth, Klaus. En Leederkranz. TextGrid Digitale Bibliothek. https://hdl.handle.net/11858/00-1734-0000-0003-0BAD-7